SUGOD kaniadtong Miyerkules, Abril 2, 2026, gipatuman na ang P20.00 nga bag-ong minimum nga pletehan sa traysikol dinhi sa dakbayan sa Tagbilaran.
Kini human giaprobahan sa Sangguniang Panlungsod ang P5 nga provisional increase sa mga traysikol atol sa regular session niadtong Martes, Marso 31, 2026.
Miingon si Konsehal Leonides’ Edi” Borja, chairman sa Committee on Public Utilities, nga ang giaprobahang usbaw sa pletehan sa traysikol maoy tubag sa hangyo sa mga drayber ug operator tungod sa padayong pagsaka sa presyo sa produktong petrolyo nunot sa padayong kagubot sa Middle East.
Giklaro niya nga ang minimum lang nga pletehan sa traysikol ang niumento apan magpabilin ang P2 sa matag mosunod nga kilometro ingon man ang paghatag og 20 porsyento nga diskwento o P16 sa mga estudyante, senior citizens ug person with disabilities (PWDs).
Gtin-aw usab sa beteranong magbabalaod nga temporaryo lang ang usbaw nga giisip nga makatarunganon ug patas aron maibanan ang kalisud nga giantos sa mga operator ug drayber sa pagkakaron.
Matod niini nga mahimong bawion ang provisional fare increase kon mous-os ang presyo sa mga produktong petrolyo.
Apan, kinahanglan pang maggama og formula alang sa pag-os-os sa pletehan, sumala ni Borja. (RTB)
