KARON pa lang daan, nilutaw na ang mga interesado sa pagka presidente sa League of Municipalities of the Philippines-LMP Bohol chapter ug sa Philippine Councilors League-Bohol.
Suma pa sa tinubdan, dunay term-sharing nga mahitabo tali ni Pres. CPG Mayor Fernando “Eping” Estavilla ug comebacking Calape Mayor ug kanhi bise gobernador Julius Herrera.
Puros naila nga suod sa mga Aumentado sila Estavilla ug Herrera.
Dunay mga tigpaniid sa politika nga nibutyag nga posibleng usa sila si reelectionist Mayor Joseph Rañola ug Corella Mayor-elect Manju Lim ang mga “darkhorse” sa umaabot LMP elections.
Kusog usab ang huhungihung nga si Rañola sa usa ka tigum sa mga mayores nga kapartido ni Congw. Kristine Alexie Besas-Tutor sa tersero distrito, gi-endorso kini sa Kongresista nga maoy ma-presidente sa LMP-Bohol.
Si Lim nipilde kang incumbent mayor Dee Tocmo ug maoy nanguna sa “Alagang ML” Advocacy sa ilang lungsod.
Sa laing bahin, sa PCL giingong dunay term sharing agreement usab nga mahitabo tali ni San Isidro councilor-elect Gloria Biwang-Gementiza ug Tagbilaran City councilor-elect Nic Besas.
Si Gementiza ang kapikas ni San Isidro mayor, Atty. Diosdado “Dadz” Gementiza Jr. samtang si Besas ang amahan ni Congw. Tutor. (Kahlil Lester O.Camba)
