NISAKA ang presyp sa mga palitonon ug serbisyo sa Central Visayas ngadto sa 5.6 porsyento sa buwan sa Enero niining tuiga gikan sa 3.8 porsyento sa Disyembre 2025 ug 2.9 porsyento sa Enero 2025 kini base sa taho sa Philippine Statistics Authority (PSA)-7.
Si Engineer Leopoldo Alfanta, Jr., chief statistical specialist sa PSA-7 Statistical Operations and Coordination Division nagkanayon nga ang paspas nga pagsaka sa presyo tungod sa mas mahal nga serbisyo sa mga restaurant ug akumodasyon, kauban ang pagtaas sa gasto sa housing-related utilities ug transportasyon.
Gipadayag ni Alfanta nga ang index alang sa restaurant ug akumodasyon nisaka sa 9.1 porsyento sa Enero niining tuiga gikan sa 1.0 porsyento sa Disyembre sa niaging tuig diin mao kini ang nag-unang rason sa pagsaka sa inflation sa rehiyon. Sunod niini ang housing, tubig, kuryente, gas ug uban pa’ng fuel nga nisaka sa 3.1 porsyento gikan sa 1.1 porsyento ug transportasyon nga nisaka sa 2.2 porsyento gikan sa -1.1 porsyento sa niaging bulan. Natala usab ang mas paspas nga pagtaas sa presyo sa alcohol ug tabako, sinina ug sapatos, gamit sa panimalay, kahimsog, impormasyon ug komunikasyon, kalingawan ug kultura, ug personal nga panginahanglan.
Samtang, ang inflation rates o pagsaka sa presyo sa pagkaon ug sa dili alcohol nga ilimnon ana sa 8.2 porsyento; serbisyo sa edukasyon, 2.6 porsyento; ug serbisyo pinansiyal, 0.0 porsyento nagpabilin nga parehas sa buwan sa Disyembre.
Sa mga commodity group, ang pagkaon ug sa dili alcohol nga ilimnon nagpabilin nga pinakadako nga contributor nga naglangkub sa 59.4 porsyento o 3.33 percentage points sa kinatibuk-ang inflation.
Sunod niini ang restaurant ug akumodasyon nga adunay14.7 porsyento share; ug housing ug utilities nga adunay 12.3 porsyento share. Ang food inflation sa rehiyon nagpabilin sa 8.7 porsyento diin ang pinakadako nga contributor mao ang utanon ug related crops nga adunay36.2 porsyento share; isda ug uban pang seafood, 34.1 porsyento; ug karne ug uban pang produkto sa hayop nga adunay 14.2 porsyento. (RTB)
