GIPADAYAG sa labing labaw nga Bokal ug bag-ong napiling bise-gobernador sa Bohol, Dionisio Victor A. Balite, Ph.D nga gamay ra ang gidaghanon sa mga sakop sa rebeldeng New People’s Army (NPA) dinhi sa Bohol mao nga dili angayang ikaalarma.
Kini ang reaksyon ni Balite nunot sa nahitabong engkuwentro sa militar ug mga NPA didto sa Negros Oriental, ubang bahin sa Visayas, ug sa pipila ka bahin sa Mindanao.
Hinuon matod ni Balite nga bisan pa niini dili kakompyansahan ang kalihokan sa mga rebelde bisan gamay ra ang ilang ihap nga ania sa lalawigan.
Siya miingon nga base sa impormasyon nga iyang nadawat gikan sa armadong kusog sa nasod (AFP) nga dili ra moabot og 20 ang mga armadong NPA nga ania sa Bohol.
Midugang si Balite nga hatagan og dakong pagtagad sa bag-ong mamunuan unya sa probinsiysa ang kahimtang sa kahusay ug kalinaw.
Sukwahi kini sa mga pagsaway karon nga wa kaayo hatagig pagtagad sa kasamtangang namunuan ang pagtubag sa problema sa insurhensiya ug inanay nga pagbalik sa kalihokan sa walhong grupo dinhi sa Bohol. (RTB)
