GIDUSO ni Gobernador Erico Aristotle Aumentado ang resulta sa Feasibility Study (FS) nga nagtanyag og mga konkretong solusyon aron mapagaan ang nagkagrabe nga trapiko sa intersection sa J.A. Clarin – Rajah Sikatuna ug sa dapit sa Manga Public Market.
Atol sa panagtagbo niadtong Pebrero 5, 2026, gipresentar sa POIEL Engineering and Management Services ang tulo ka alternatibong pamaagi, lakip na ang sugyot nga pagtukod og rotonda (roundabout) sa J.A. Clarin – Sikatuna intersection nga gibanabanang mokantidad og Php 43.63 milyon alang sa proyekto ug Php 83.16 milyon alang sa Right of Way (ROW).
Gawas sa rotonda, gihisgutan usab ang J.A. Clarin – Sikatuna Intersection Bypass Road nga nagkinahanglan og budget nga Php 80.25 milyon, samtang tulo ka mga rota ang gitan-aw alang sa Manga Bypass Roads: ang Manga-Dela Paz, Tiptip-Lourdes, ug Cabawan-Lourdes.
Base sa pagtuon, gikinahanglan nga himuong 4-lane ang maong mga agianan aron masiguro ang hapsay nga dagan sa mga sakyanan, butang nga nagkinahanglan og lapad nga widening operation ubos sa koordinasyon sa kagamhanang lokal sa Dakbayan sa Tagbilaran.
Tungod niini, itugyan ni Aumentado ang maong FS ngadto sa Department of Public Works and Highways (DPWH) ug sa kagamhanan sa dakbayan aron mapadali ang implementasyon. Ipresentar usab ang maong plano ngadto sa Provincial Development Council (PDC) ug Regional Development Council (RDC) alang sa paggahin og pondo.
Malaumon ang gobernador nga pinaagi niining maong lakang ug sa pakigtambayayong sa Provincial Planning and Development Office ug Provincial Engineering Office, hingpit nang masulbad ang problema sa kahuot sa trapiko nga nag-apektar sa mga national roads sa lalawigan. (RTB)
