GIKLARO ni Chairman Cylwin Bomediano sa One Bohol for BBM and SARA nga walay instruction ang grupo ni president-elect Bongbong Marcos nga manghatag og cash assistance ug papirmahon og form nga bayran og tag P2, P5 ug P20.
Ang pamahayag giluwatan ni Bomediano isip tubag sa pangutana kalabot niini gikan sa pipila ka lungsod sama sa Tubigon, Antequera, Sevilla ug lakip na gikan sa dakbayan sa Tagbilaran.
Matod niya nga wa sila nagpasiugda sa pagpanghatag og mga porma sa kabarangayan nga giingong papirmahan alang sa cash assistance.
Matod ni Bomediano nga wala silay nadawat nga instruction gikan sa kampo ni BBM sa Manila nga mopasiugda og ingon niining kalihokan ug wa sila kahibawo unsang grupo ang nang distribute og mga porma sa mga kabarangayan sa Bohol.
Iyang giawhag ang katawhan nga makig coordinate sa ilang mga chairman sa kalungsoran aron sila magiyahan ug dili mabiktima niining maong kalihokan.
Gikataho nga dunay mga barangay official mismo nga matod pa maoy nangunay pag distribute sa mga porma ug dunay mangolekta og kwarta gikan sa P2 ngadto sa P20 nga bayad sa porma.
Ang pamahayag ni Bomediano gidasonan usab ni Bert Suarez Gacera ug Jeconias Ursos nga lakip sa naglihok sa One Bohol for BBM and Sara dinhi sa Bohol. (RTB)
