SA nasud nga init pa’s nagbukal nga tubig ang pulitika, lisod alang sa taga-Oposisyon ang pagsuporta sa ana-a sa Administrasyon.
Mao kini ang reyalidad, ug kini atong nakita ug makita sa barangay, sa lungsod, distrito, probinsya ug sa kinatibuk-ang nasud Pilipinhon.
Ang anak nga Marcos nga si BBM, wala pa gani makalingkod, gidabudabuhan na sa mga protesta, kay lage dili gusto nga mahibalik sa trono ang usa ka Marcos.
Ana-a ang mentalidad sa mga tawo nga kun, kontra, dili gayud suportahan aron kini magkalisod-lisod sa pagdumala, ug mao usab kini ang gibuhat sa ubang mga opisyales sa Oposisyon aron mahimong dautan ang nawong sa liderato sa naglingkod o mulingkod pa.
Mao usab kini ang usa sa mga dakong hinungdan nganong nagpabiling kabus ang Pilipinas, kay dili magkatakdo ang mga baruganan sa mga lider.
Ang 31.6 milyones nga boto nga nakuha ni BBM usa ka lig-ong testamento nga siya maoy giganahan sa mayorya sa mga Pinoy, bisan pa ana-a ang panggukod batok sa ilang pamilya sa giingong mga “ill-gotten wealth” o mga bahandi nga kinawat gikan sa kaban sa katawhan panahon sa martial law.
Sa nahuman nga Eleksyon, sa tinuod lang, dili ko pro-Marcos, kay ana-a usab ako’y mga rason.
Apan karon nga siya man ang nidaug, pabor ko nga suportahan siya kaysa atakehon.
Ngano? Kay nagkinahanglan man kita og lider nga mudumala kanato. Ug karon nga nakahukom ang kadaghanan sa katawhan nga siya ang musunod ni Presidente Rodrigo Duterte, angay kanang dawaton.
Dili man sa tanang panahon makaingon kita nga “like father, like son”. Kay bisan kami sa akong amahan, anaay mga punto sa pulitika nga lahi-lahi kami og baruganan.
Dili nato masukod o makita ang abilidad ni Bongbong kun dili nato siya pasagdan nga mahimong lider sa nasud Pilipinhon.
Gipili siya sa gahum sa demokrasya ug angay abagan aron mulampos. Kini ang atong hangyo sa atong mga kaigsoonan nga ana-a pa sa kasuko sa pamilyang Marcos.
Kun magbinuang siya, puwede man siya nga i-‘impeach’ o ipasiugda ang People Power 3.
Anaay balaod alang sa tanang aksyon sa mga lider sa katawhan — silutan sila sumala sa ilang binuhatan. Daygon sumala sa maayong binuhatan.
Daghan og mga problema nga sagubangon si BBM ug usa na niana ang pagpabarog og balik sa nahagsa nga ekonomiya sa nasud.
Atong suportahan ang bag-ong administrasyon kun maayo ang dagan sa liderato niini, apan kun dili, kita ang mulihok aron siya o sila mapalayas gikan sa hinuwamang lingkuranan de gobyerno.
Kitang katawhan maoy mata sa mga isyu ug kontrobersiya nga mahitabo sa atong gobyerno ug mga opisyales nga atong gisaligan.
Atong gidamgo nga mu-uswag ug mu-lambo ang Pilipinas ug ang atong personal nga pamuyo, ug kana magsugod sa atong positibong panglantaw sa kinabuhi.
* * *
Akong pagpaabot sa pahasubo sa pamilyang Diez ug Bantugan sa pagbiya niining kalibutana ni Atty. Danilo “Dandan” Bantugan, kanhi City Councilor sa siyudad sa Tagbilaran, akong kanhi abogado ug tag-iya, Publisher-Editor sa Bohol Sunday News (BSN), diin usa usab ako ka columnist sa iyang newspaper.
Rest in peace, Atty. Bantugan!
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Mudawat lamang og seryoso ug dili binuang. Mag-amping kita, mga Bol-anon!
