HUGOT ang pag-monitor sa Department of Health – Bohol batok sa posibleng pagsulod sa Nipah Virus sa probinsya, bisan pa man sa wala pay natala nga kaso dinhi sa Bohol.
Matud ni Dr. Van Phillip Baton, Development Management Officer sa DOH-Bohol nga padayon ang ilang koordinasyon sa mga ospital, rural health units, ug local government units aron masiguro ang andam nga surveillance ug dali nga pag-report kon dunay suspetsadong kaso.
Giila nga usa ka zoonotic disease ang Nipah Virus nga mahimong mapasa gikan sa hayop ngadto sa tawo, ilabina pinaagi sa fruit bats, ug mahimong hinungdan sa grabe nga sakit sa utok ug sistema sa pagginhawa.
Gipaniguro sa DOH Bohol nga andam ang lokal nga health system sa pag-atubang sa bisan unsang posibleng hulga sa panglawas, ug nagpabiling luwas ang probinsya samtang padayon ang hugot nga pag-monitor batok sa Nipah Virus. (RTB)
