GARBO sa lungsod sa Loon ug sa tibuok probinsya sa Bohol ang pagkahatag sa pasidungog ngadto sa Loon Municipal Police Station isip Best Municipal Police Station (Class B Category) sa tibuok Pilipinas. Ang maong pag-ila gitunol atol sa pagsaulog sa PNP Day 2026 nga gipahigayon sa Camp Rafael T. Crame, Quezon City, kaniadtong Enero 29, 2026.
Personal nga gidawat ni Police Captain Thomas Zen Cheung, ang hepe sa Loon PNP, ang tropeyo gikan sa mga kadagkoan sa nasod nga gipangunahan ni Executive Secretary Hon. Ralph G. Recto, PNP Chief General Jose Melencio Nartatez Jr., ug DILG Secretary Jonvic Remulla.
Kini nga award nagpamatuod sa maayo ug dekalidad nga serbisyo, disiplina, ug propesyonalismo sa maong buhatan sa kapulisan sa pagpatuman sa balaod ug pagpanalipod sa katawhan.
Dako usab ang pagpasalamat sa Loon PNP sa giya ug suporta nila ni PBGEN Redrico A. Maranan, ang Regional Director sa PRO-7, ug PCOL Patricio C. Degay, ang Provincial Director sa Bohol PPO.
Ang ilang epektibo nga pagdumala maoy nahimong dalan aron makab-ot ang maong nasyonal nga kalampusan ug mapabilin ang taas nga sumbanan sa operasyon sa kapulisan.
Gawas sa internal nga liderato, giila usab nga dakong hinungdan sa maong kadaogan ang hugot nga suporta sa lokal nga kagamhanan sa Loon ubos sa pagdumala ni Mayor Pedro M. Literatus Jr.
Ang kooperasyon sa mga lumulupyo ug ang aktibong pakiglambigit sa komunidad ngadto sa mga programa sa PNP nahimong yawe aron mamintinar ang kalinaw, kahapsay, ug seguridad sa tibuok lungsod. (RTB)
