GIKATAKDA nga ipahigayon dinhe sa Bohol matag adlaw’ng Biyernes alas 8 sa buntag hangtod sa alas 5 sa hapon, sugod karong Pebrero 6, ang operasyon sa mobile franchising ug uban pang mga serbisyo sa Land Transportation Franchising and Regulatory Board Region -7 (LTFRB-7) uban ang pakigtambayayong sa Kagamhanang Probinsyal sa pagpangulo ni Gobernador Erico Aristotle Aumentado.
Kini, human gipadayag sa Officer-in-Charge (OIC) sa LTFRB-7 Regional Director Eugenio P. Ibo, Jr. ang maong katuyuan atol sa ilang pagbisita sa Gobernador diha sa opisina niini, uban kang Mr. Victor Cosep (LTFRB-7) Enero 27, 2026.
Ang Gobernador kinsa tinguha usab nga ikapadangat sa LTFRB direkta ngadto sa mga Bol-anon ang mga serbisyo sa maong ahensya, mitanyag sa paghatag pinaagi sa Kagamhanang Probinsyal og sakto nga dapit, uban sa lamesa, mga lingkuranan, ug uban pang kinahanglanong amenities para sa LTFRB dinha mismo sa ground floor kun lobby sa bag-ong kapitolyo, isip LTFRB desk.
Nianang paagiha dili na kinahanglanon nga muadto sa Sugbo alang sa maong katuyuan busa malikayan ang dugang kagastuhan ug kahasol kung mag-avail sa mga serbisyo sa LTFRB.
Dugang niini, adunay mga staff nga mahimong mutabang sa empleyado sa LTFRB aron paspas ang mga transaksyon.
Sa maong kukabildo, gisubay usab sa Gobernador ang status sa mga aplikasyon sa local government units (LGU) ug sa Kagamhanang Probinsyal kabahin sa Local Public Transport Route Plan (LPTRP) kung aprobado na ba kini diin, matud sa Regional Director nga aduna pa’y pipila ka mga aplikasyon, nga gipahigayon ang ginagmay nga revisions niini.
Sa laing bahin, gipadangat usab sa Gobernador ang hangyo nga dugangan ang 100 nga slots sa Bohol alang sa mga Transport Network Vehicle Services (TNVS) sama sa grab og dugang 100 ka slots.
Gipresentar usab sa Gobernador ang umaabot nga operasyon sa mga electric vehicles dinha sa nag-unang mga national roads sa Tagbilaran City, Dauis ug Panglao isip kabahin sa pag-promote sa turismo sa probinsya.
Kahinumduman nga sa nakalabay nga ASEAN meeting uban sa Energy Secretary Sharon Garin, ang electric vehicles gikonsiderar nga alternatibong sakyanan isip kabahin sa pag-amping sa kalikopan.
Si RD nagkanayon nga open ang LTFRB sa pagkonsiderar sa maong mga programa.
Sa pagkakaron gipanguluhan ni LTFRB Chairman Atty. Vigor Mendoza II ubos sa pagsuporta sa DOTr ang implementasyon sa full digitalization sa mga serbisyo sa LTFRB partikular sa Mobile Franchising Digitalization sa mga TNVS ug uban pang pampublikong mga sakyanan (RTB)
