PORMAL nga gipasidunggan sa Sangguniang Panlalawigan (SP) sa Bohol si Fire Superintendent Raul Bustaliño, Provincial Fire Marshal sa Bohol, tungod sa iyang pagdaug sa pinakataas nga regional awards ug national recognition sa kaluwasan publiko alang sa 2025.
Si Board Member Nathaniel Binlod, vice-chairman sa Sangguniang Panlalawigan Committee on Peace, Order and Public Safety ang niduso sa resolusyon nga pormal nga mupasidungog kang FSupt. Bustaliño ug sa BFP–Bohol Provincial Office, nga giaprobahan atol sa regular nga sesyon sa Sangguniang Panlalawigan niadtong Martes, Enero 20, ubos sa pagpangulo ni Vice Governor Nicanor Besas.
Sa iyang privilege speech, giingon ni Board Member Nathaniel Binlod nga ang “historic sweep” ni Bustaliño sa mga award sa Bureau of Fire Protection (BFP) nagpakita sa kusgan ug epektibong liderato nga nakapataas sa fire protection services sa Bohol ngadto sa pinakataas nga lebel sa Central Visayas.
Si Bustaliño mao ang Best Senior Commissioned Officer of the Year 2025 atol sa 52nd Fire Service Recognition Day sa BFP Region 7. Sa maong okasyon, ang Office of the Provincial Fire Marshal–Bohol mao sab Best Provincial Fire Office of the Year 2025, isip pag-ila sa pinakataas nga performance sa operasyon ug serbisyo sa rehiyon.
Sa national nga lebel, nahimo usab si Bustaliño nga Finalist sa Search for the Ten Outstanding Firefighters of the Philippines (TOFP) 2025, usa ka prestihiyosong ‘search’ nga gipangulohan uban sa SM Prime Holdings, diin napili lamang ang napulo ka bombero sa tibuok nasud.
Matod pa ni Binlod, ang maong mga award “dili lang simboliko kondili nagpasabot og mas luwas nga Bohol, episyenteng fire service, ug lideratong matinud-anon ug makadasig.” (RTB)
