NAGPAHIGAYON og coordination meeting, Miyerkules sa buntag ang mga opisyal sa Tagbilaran City Engineering Office ug sa Department of Public Works and Highways (DPWH) Bohol 1st District Engineering Office aron tapuson ang mga plano para sa usa ka dakong integrated drainage ug wastewater treatment project sa siyudad.
Ang proyekto, nga gipondohan ilawom sa General Appropriations Act (GAA) 2025, tumong nga masulbad ang dugay nang problema sa drainage ug mapatuman ang modernong wastewater treatment facilities sa mga barangay sa Cogon, Booy, ug Taloto.
Sumala kang Engr. Noel Datahan sa City Engineering Office, ang miting mitutok sa pag-angay sa teknikal nga mga plano sa aktuwal nga kahimtangan sa lugar ug sa paghisgot sa mga isyu sa operasyon.
Ang proyekto nga ginganlan “Construction of Drainage Structure, Jct. Tagbilaran North Road K0002+170 and Peñaflor Street Leading to Outfall with Integrated Wastewater Treatment,” dili lamang alang sa flood control kondili usab sa pagpanalipod sa kinaiyahan pinaagi sa pagpugong sa pagbuhagay sa walay tratadong hugaw o untreated ngadto sa coastal outfalls.
Gipatuman ang maong inisyatiba ilawom sa liderato ni Mayor Jane Yap ug Vice Mayor Adam Relson Jala, uban sa suporta sa lehislatura gikan kang Bohol 1st District Representative Baba Yap.
Mitambong sa miting sila City Engineer Teodoro Estoque; DPWH Planning Head Engr. Julius Cesar Cadao uban kang Engrs. Amiel Sacdalan ug Ma Fe Manug; Provincial Engineer Eustaquio Caliao; Atty. Jojo Namocatcat sa Provincial Legal Office; ug Jeffrey Escaso sa Bohol Provincial Environment Management Office.
Nagkahiusa ang mga opisyal sa pagpaspas sa pagkompleto ug pagsumite sa tanang gikinahanglan nga dokumento aron masiguro ang hapsay ug tukmang panahon nga pagpatuman sa integrated wastewater treatment system kauban sa mga drainage structure. (RTB)
