WALA’Y natala nga insidente sa indiscriminate firing ang Police Regional Office (PRO)-7 atol sa pagsugat sa Bag-ong Tuig sa tibuok Central Visayas.
Si Philippine National Police (PNP) Chief, Police Lieutenant General Jose Melencio Nartatez Jr. daan ng nimando sa mga sakop nga pahugtan gyud ang kampanya batok tanang krimen apil na kining pagpabuto og armas.
Gani dunay One-Strike Policy nga gipatuman aron nga mismo ang mga hepe sa tanang police stations ug police units moseryuso sa ilang trabaho nga mamentinar ang luwas, hapsay ug malinawong selebrasyon.
Atol ning pagsuwat sa balita, walay natala nga dunay naigo og saag nga bala gikan sa iresponsableng pagpabuto og armas atol sa selebrasyon.
Gawas niana, samtang dunay mga nabiktima sa pabuto walay natala dakong panghitabo gikan sa December 31, 2025 hangtud sa January 1, 2026.
Si PRO-7 Regional Director Police Brigadier General Redrico Maranan miingon nga resulta kini sa maayong liderato ug disiplina sa kapolisan.
“The CPNP’s One-Strike Policy was clearly understood and strictly enforced. Our strong police presence sent a clear message that any act endangering lives will not be tolerated, and accountability will be swift and uncompromising”, matud ni Maranan.
Sa kinatibuk-an, gihulagway sa kapolisan nga generally peaceful ang selebrasyon.
Dunay mga minor firecracker related injuries apan gikonsiderar nila kining isolated incident ug wala makaapektar sa selebrasyon.
“I extend my sincere appreciation to our communities, partner agencies, local government units, and our police personnel for their cooperation and vigilance. Despite minor firework related incidents, the welcoming of Year 2026 remained generally peaceful and orderly. This reflects our shared commitment to public safety and responsible celebration. May this peaceful beginning lead us toward a prosperous year ahead,” ni Maranan pa. (RTB)
