GIPAHIMANGNOAN sa Bohol Police Provincial Office (BPPO) ang tanang kapolisan ug mga sibilyang tag-iya og armas dinhe sa Bohol nga likayan ang indiscriminate firing atol sa selebrasyon sa Pasko ug Bag-ong Tuig, samtang ipatuman ang zero-tolerance policy aron mapanalipdan ang kaluwasan sa publiko.
Sumala kang BPPO Provincial Director Police Colonel Patricio Degay nga ipatuman ang one-strike policy batok sa bisan kinsang pulis nga mapamatud-ang nalambigit sa celebratory gunfire, nga maglakip sa administrative ug criminal nga mga kaso.
Ang mga administrative nga silot mahimong moabot sa pagtangtang sa serbisyo, pagkawala sa benepisyo, ug perpetual disqualification sa paghawid og posisyon sa gobyerno. Samtang ang mga criminal nga kaso mahimong ipasaka ubos sa Revised Penal Code ug ubang may kalabotan nga balaod, depende sa resulta sa imbestigasyon.
Gipahinumdoman usab ni Col. Degay ang mga commander sa ilang responsibilidad sa pagpatuman sa disiplina sulod sa ilang mga yunit, ug mipasidaan nga manubag ang mga unit leader sa mga kalapasan sa ilang mga sakop.
Gimando usab niya ang tanang police units sa probinsya nga dayong tangtangon ug ibutang sa preventive suspension ang bisan kinsang PNP member nga maapil sa indiscriminate firing samtang nagpadayon ang imbestigasyon.
Miapela usab ang BPPO chief sa mga lisensyadong sibilyang gun owners nga magpakita og pagpugong ug responsibilidad, nga nagpasabot nga ang responsable nga pagpanag-iya og armas nagkinahanglan og self-control, husto nga pagtapig sa armas, ug hugot nga pagsunod sa balaod sa tanang panahon.
Aron mapalig-on ang pagpatuman sa balaod, gi-activate sa Philippine National Police ang mga hotline ug opisyal nga social media platforms aron dasigon ang publiko sa dayong pagreport sa mga insidente sa indiscriminate firing. Gimandoan sab ang mga police units nga maghatag og pas-pas nga responde sa tanang kumpirmadong report.
Matod sa BPPO nga kabahin kini sa ilang pagpalig-on nga security measures aron masiguro ang hilom, malinawon, ug walay maangol nga selebrasyon sa Pasko ug Bag-ong Tuig sa probinsya sa Bohol. (RTB)
