LAIN na usab nga Quo Warranto petition (QWP) ang gisang-at ngadto sa House of Representatives Electoral Tribunal (HRET) nga nagtinguha sa pagpalagpot kang kanhi Bohol governor Arthur Yap isip representanti ug unang nominee sa Murang Kuryente party-list (MKPL) didto sa Kongreso.
Ang basehan sa petisyon mao ang giingong perpetual disqualification ni Yap nga maghupot ug bisan unsang public office base sa hukom sa Ombudsman niadtong Pebrero 2025 tungod sa grave misconduct ug serious dishonesty.
Ang petitioner sa maong quo warranto petition, usa ka Wilmore Vasquez Novo nga taga Oslob, Cebu, nangatarungan nga si Yap dili kwalipikado nga mohupot sa katungdanan pagka congressman, ug walay legal nga basehanan sa pagserbisyo sa Kongreso tungod sa iyang pagka-disqualify pinaagi sa hukom sa Ombudsman nga nagpa-hamtang ug silot nga dismissal from the service kang Yap ug laing pito (7) ka mga kanhi opisyal sa Kapitolyo, nunot niadtong kasong kriminal ug administratibo nga may kalabutan sa pagkontrata ug lights and sounds alang sa gipahigayong Philippine Tourism Expo niadtong tuig 2020 sa lungsod sa Panglao, Bohol.
Matod pa sa petisyoner, ang pag-asumer ni Yap isip party-list representative sa Kongreso, void ab initio o dili balido gikan sa sinugdanan tungod kay padayong gipahamtang kaniya ang penalty nga perpetual disqualification ug tungod niini wala siyay legal nga personalidad sa pag-angkon sa posisyon sa pagka-kongresista.
Dugang pa sa petisyoner, si Yap nakahimog malimbungon ug sayop nga representasyon sa iyang nominasyon isip First Nominee sa Murang Kuryente partylist, hinungdan nga gi-awhag ang HRET sa pagpalagpot kaniya ug pagtugot sa ikaduhang nominado ni Murang Kuryente sa pag-asumir sa puwesto nga illegal nga gihuptan ni Yap.
Una niini, usa ka petisyon sa quo warranto ang gisang-at sa House of Representatives Electoral Tribunal (HRET) aron ipatangtang sa pwesto ang kanhi Gobernador sa Bohol nga si Arthur C. Yap, nga karon naglingkod isip 1st nominee sa Murang Kuryente Partylist sa Kongreso.
Ang kaso, HRET Case No. 25-017 nga giulohan og “Edgardo C. Ingking vs. Arthur C. Yap, 1st Nominee, Murang Kuryente Partylist,” gidid-an sa katungod ni Yap sa paghawid og public office tungod sa giingong kakulang sa kwalipikasyon ug limbong nga deklarasyon.
Matud ni Ingking, permanente nang gidid-an si Yap sa paghawid og public office base sa desisyon sa Office of the Ombudsman niadtong Pebrero 19, 2025 sa kasong “Dan Neri Lim vs. Arthur C. Yap (SG 30), et al.”
Sa maong kaso, giingong nakit-an sa Ombudsman si Yap ug pito pa ka empleyado sa kapitolyo nga sad-an sa grave misconduct nga adunay serious dishonesty, may kalabutan sa mga buhat nga nahitabo samtang gobernador pa siya sa Bohol.
Isip silot, gitangtang si Yap sa serbisyo sa gobyerno, lakip ang pagkawala sa retirement benefits, pagkansela sa eligibility, ug permanente nga diskwalipikasyon sa paghawid og public office. Giingon usab sa desisyon nga magpadayon ang mga silot nga kauban sa dismissal.
Gibasehan sa petisyon ni Ingking ang Section 7, Rule III sa Ombudsman’s Rules of Procedure, nga giusab pinaagi sa Administrative Order No. 17, nga naglatid nga ang desisyon sa Ombudsman padayong ipatuman ug dili mapugngan bisan pa og adunay apela. Pinasikad sa Korte Suprema sa kasong Ombudsman v. Pacuribot (G.R. No. 193336, September 26, 2018).
Tungod niini, gipadayag sa petitioner nga si Edgardo C. Ingking nga si Yap nagpabiling dismissed sa serbisyo ug permanenteng diskwalipikado, busa walay legal nga katungod sa paglingkod isip miyembro sa House of Representatives isip unang nominado sa Murang Kuryente Partylist.
Gipasanginlan usab sa petisyon si Yap sa fraudulent misrepresentation human iyang ideklara sa iyang sinumpaang Certificate of Nomination ug Certificate of Acceptance nga siya kompleto tanang gikinahanglan nga kwalipikasyon ug walay diskwalipikasyon subay sa balaod.
Si Yap naproklamar isip unang nominado niadtong Oktubre 2, 2025, human gidiskwalipikar sa COMELEC ang Duterte Youth Partylist nga unang nakadaog og tulo ka seat. Ang Murang Kuryente Partylist wala unta makakuha og igo nga boto alang sa usa ka lingkoranan, apan naproklamar tungod sa maong diskwalipikasyon.
Ang petitioner nga si Ingking usa ka rehistradong botante sa Tagbilaran City ug sakop sa Lihok Bol-anon Batok Korapsyon (LIHOK BOL-ANON).
Sa iyang bahin si Atty. Gigi Biliran sakop sa Lihok Bol-anon nga “Unfair” ang paglingkod ni Yap sa Kongreso tungod kay ang iyang mga kauban sa kaso padayon nga nisunod sa gipahamtang nga silot sa Ombudsman.
Samtang si Yap nga nakuhaan sa iyang habig mi-ingon nga wala pa siya makadawat og kopya sa gisang-at nga petisyon batok kaniya. (RTB)
