GIPAHIBAWO sa Land Transportation Office LTO-7 nga ang full-service licensing centers subling buksan sa mga lalawigan sa Bohol ug Negros Oriental aron pag- accommodate sa mga bag-ong applicants ug renewals sa driver’s licenses.
Si LTO-7 regional director Victor Emmanuel Caindec miingon ning pamantalaan nga si Assistant Secretary Edgar Galvante, ang hepe sa ahensiya miaprobar sa hangyo sa subling pagbukas sa maong mga licensing centers sa nahisgotang mga lalawigan isip kabahin sa ilang lakang aron dili maghuot sa mga kliyente ang main LTO offices sa maong mga probinsiya.
Sa suwat nga gipadala kang Galvante pinagi ni LTO executive director Atty. Romeo Vera Cruz, si Caindec mihangyo niadtong Marso ning tuiga alang sa reactivation sa licensing renewal functions ug issuance sa student permits sa mga driver’s license renewal offices (DLROs) sa Robinsons Dumaguete ug Island City Mall sa Tagbilaran City.
Matod ni Caindec nga ang maong mga buhatan una nang gisira gumikan sa hinay nga volume sa mga kliyente nunot sa limitadong mga serbisyo nga gitanyag ug gumikan usab sa gipatuman nga lockdown tungod sa Covid-19.
Ang ubang mga buhatan sa LTO sa Bohol naglakip sa Jagna District Office-Garcia Hernandez sa West Canayaon, Garcia-Hernandez; Tagbilaran City District Office sa R. Enerio St. Dampas Road, Tagbilaran City; Talibon Extension Office sa Poblacion, Talibon; ug Tagbilaran District Office Licensing Ext. (Alturas Mall) sa Poblacion II, Tagbilaran City.
Ang Bohol Licensing Center target nga buksan sulod ning buwan sa Mayo. (RTB)
