GITUMBOK nga suspek sa pagpusil-patay sa usa ka barangay kagawad didto sa Brgy. San Pascual, Ubay, nadakpan sa gihimong hot pursuit operation sa kapolisan didto sa maong lungsod mga alas 11:30 sa gabii niadtong Nobiyembre 18.
Ang suspetsado giila nga si Teobi Tampor, hamtong ang pangedaron, handler og manok, taga Barangay Pag-asa, Ubay, Bohol.
Sigun sa taho nga nadakpan ang maong suspek mga 18 ka oras human nahitabo ang maong krimen human sa gihimong hot pursuit operation sa ginsakpan sa Ubay Municipal Police Station, pinaagi kini sa tabang sa mga eye witness ug CCTV camera nga gimontar duol sa nahitaboan sa pagpatay.
Si PCapt Amelito Melloria, hepe sa Ubay PNP nibutyag nga gitudlo ang maong suspek sa mga eyewitnesses ug sa tabang sa CCTV ug narekober usab sa kapolisan ang motorsiklo nga gigamit sa maong krimen.
Gipunting sa gihimong imbestigasyon nga personal nga panagbangi ang motibo sa maong pagpusil patay.
Sayo niini, patay ang usa ka barangay kagawad human gipusil sa wa mailhing mamumuno didto sa Brgy. San Pascual, Ubay, Bohol mga alas 6 sa buntag, Martes, Nobiyembre 18, 2025.
Ang biktima giila nga si Kag. Jovie “Jojo” Inalem y Catubig, 45 anyos, minyo, molupyo sa Purok 1, San Pascual, Ubay, Bohol.
Matud sa taho nga ang insidente nahitabo samtang ang maong biktima luwan sa iyang motorsiklo diin dihang pag-abot sa dalan padung sa Barangay Bulilis, Ubay, kalit lamang gipusil sa wa mailhing mga suspek.
Gipasakaan na og ang kasong Murder ang maong suspek didto sa piskaliya. (RTB)
Drug Pusher sikop sa Tagbilaran; Top 1 MWP Nasikop sa Guindulman
Nasikop sa kapulisan sa Tagbilaran City Police Station ang usa ka street-level drug peddler, Nobyembre 19, atol sa gipahigayon nilang buy-bust operation sa Purok-1, Simbit St., Barangay Dao.
Ang operasyon gipadagan alas 1:18 sa kadlawon sa Drug Enforcement Team (DET) nga giabagan ni PMSg Joel Orapa, ubos sa direct supervision ni PLTCOL JOHN KAREEN O. ESCOBER, hepe sa Tagbilaran City Police Station.
Target sa operasyon ang 49-anyos nga lalaki, unemployed, ug usa ka watchlisted individual nga taga-Barangay Potohan, Tubigon. Gikan kaniya nasakmit ang 15 gramos nga giisip nga shabu nga nagkantidad og ₱102,000.00, lakip na ang pre-marked buy-bust money.
Ang maong kalampusan nagpamatuod sa padayon nga paningkamot sa PNP Bohol sa pagpakunhod sa operasyon sa ilegal nga droga ug nagpahimangno sa tanang nalambigit nga dili sila hunongan hangtod makab-ot ang hustisya.
Samtang sa lungsod sa Guindulman, lalaki nga gitumbok nga Top 1 Most Wanted Person (MWP) gumikan sa krimen nga giatubang niini sa korte nadakpan sa kapolisan didto sa Purok 2, Brgy. Tabajan, Guindulman, Bohol, niadtong Martes sa gabii, Nobiyembre 18.
Ang akusado giila nga si Jimmy Lacaran y Musong, 48 anyos, minyo, usa ka negosyante, molupyo sa Purok 2, Tabajan, Guindulman.
Ang Tracker Team sa Candijay Municipal Police Station, nisikop sa maong akusado. Pinasikad sa gahom sa warrant of arrest nga giluwatan ni Hon. Panfilo Sala Jr., Presiding Judge, RTC Branch 51, Carmen, Bohol gumikan sa krimeng upat ka mga ihap (four counts) sa STATUTORY RAPE. Penetsahan niadtong Nobiyembre 11, 2025.
Way piyansa ang girekomendar sa maong hukmanan batok sa maong akusado. (RTB)
