SUBLING mosugyot sa Kongreso si re-elected third district Rep. Alexie Besas Tutor sa re-nationalization sa Candijay Community Hospital (CCH) kay si Gobernador Art Yap, kinsa kaniadto nagpanuko sa pagsuporta sa maong lakang, mokanaug naman na sa katungdanan sa alas 12:01 sa udto sa Hunyo 30, 2022.
Matod ni Tutor, mopasaka siyag laing balaodnon nga mag-convert sa CCH ngadto sa district hospital ug makadugang sa bed capacity niini samtang ibalhin kini gikan sa administrasyon sa probinsiya sa Bohol ngadto sa Department of Health (DOH).
Ang una ug ikaduhang distrito adunay mga ospital nga gipadagan sa DOH sa Governor Celestino Gallares Memorial Hospital sa Tagbilaran City ug Don Emilio Del Valle Hospital sa Ubay.
Niadtong Nobiyembre 2020, ang balaodnon ni Tutor nga naghangyo sa renasyonalisasyon sa CCH giaprobahan sa komite sa panglawas sa Kamara apan ang maong lakang wala madayon human siya napakyas sa pagkuha og endorsement gikan sa Sangguniang Panlalawigan (SP) nga gidominar sa mga kaalyado ni Yap.
Ang kagamhanang probinsiyal pinaagi ni Dr. Yul Lopez kinsa nangulo sa hospital services department sa Kapitolyo nitumbok sa posibleng ‘redundancy’ sa pag-renationalize sa tambalanan tungod kay ang mga tambalanan sa probinsiya sakop sa Universal Healthcare Law nga nagkinahanglan og suporta sa nasudnong kagamhanan alang sa local health facilities.
Sa laing bahin, taliwala sa nagkataas nga suporta sa inisyatiba ni Tutor, si Yap nipagawas og ultimatum nga nag-ingon nga iyang paluyohan lamang ang maong lakang kon ang kongresista makakuha og sinulat nga kasiguroan gikan sa DOH nga nag-ingon nga mogahin kini og P100 milyones alang sa renationalization ug sa modernisasyon sa CCH.
Ang balaudnon ni Tutor wala mulampos human siya napakyas sa pagkuha sa endorsement sa probinsiya. Anaa na unta sa Provincial Health Board nga gipangulohan ni Yap ang pagdesisyon kon ang kagamhanang probinsiyal, uban sa pagtugot sa SP, mo-endorso sa balaudnon ni Tutor sa Kongreso.
Apan, ang pagbag-o sa pamunoan sa ehekutibo ug lehislatibo nga mga sanga sa kagamhanang probinsyal gilauman nga makapalihok na usab sa renasyonalisasyon sa CCH.
Samtang sa susamang kalambuan, sa usa ka press briefing kaniadtong Huwebes, si Tutor miingon nga si Gobernador-elect Aris Aumentado nagpasalig sa suporta alang sa lakang.
Si Yap napildi ni Aumentado sa iyang re-election bid samtang ang umaabot nga SP dominahan usab sa mga kaalyado nilang Tutor ug Aumentado nga midagan ubos sa samang koalisyon sa 2022 nga eleksyon.
Matod ni Tutor, aduna pay dugang budget ang DOH aron mapaayo ang CCH pinaagi sa General Appropriations Act (GAA).
Ma-modernize usab niini ang pasilidad nga walay kabug-at sa pinansiyal sa kagamhanang probinsiyal nga nagplano kaniadto nga mo-loan alang sa pagpaayo sa tambalanan. (RTB)
