GIPANGULUHAN ni Gobernador Erico Aristotle Aumentado, Congresswoman Van-van Aumentado, ug Bohol Police Provincial Office (BPPO) ang turnover ceremony Nobyembre 15, ngadto sa tulo ka pamilya sa Sagbayan, sa mga balay nga hinabang gikan sa Balay sa Paglaum ug Libreng Alagad ug Balay.
Si Alberto ug Expedita Gumapac, ika-95 nga benepisyaryo, lumulupyo sa Barangay Canmaya Diot, Sagbayan; samtang si Alvin Cajetas ug Merlyn Requierme ang ika-96 sa Barangay Kagawasan; ug si Jorjet Rosas sa Barangay Sta. Cruz, Sagbayan mao ang ika-97 nga benepisyaryo.
Si Alberto nga membro sa Bayanihang Bol-anon Farmers and Fisherfolks Association, ingun man si Alvin ug si Jorjet, dako og pagpasalamat isip benepisyaryo sa adbokasiya sa pamilya Aumentado. Natabangan sila aron makabaton og hamugaway nga kapuy-an human sa pila ka tuig nga pag-antos sa pagkaguba sa ilang balay tungod sa bagyong Odette.
Si Congresswoman Van-van sa segundo distrito mipasalamat sa suporta sa mga nagboluntaryo pagtukod sa balay. Matud niya, bisan pa man kung adunay ayudang pinansyal gikan sa ilang personal nga panudlanan, mas makaayo ang inisyatibo sa kapulisan nga gipanguluhan ni PLTCOL Norman Nuez sa Sagbayan, uban kang PCPT Eric Binangbang nga nangunay pagtukod, uban sa mga opisyales sa tagsa tagsa ka barangay aron mas daghan ang matabangan.
Si Gob. Aumentado sa iyang bahin mapasalamaton sa mga volunteers ug sa BPPO isip kapartner sa ilang personal nga adbokasiya nga Balay sa Paglaum.
Miawhag kini sa mga benepisyaryo nga padayong manginabuhi isip mga ehemplo sa komunidad, ug ampingan ang balay nga ilang nadawat aron kapahimuslan kini sa dugay pa nga katuigan.
Gidasig sa Chief PCADU PLTCOL Nuez ang publiko nga kung adunay makit-an nga angay tabangan, tungod kay wa pa nakabangon sukad sa Bagyong Odette, mahimo nila nga kuhaan og hulagway ang balay ug ipahibalo sa kapulisan ang impormasyon. Kini aron masubay sa hingtungdang police station ug maapil sa mga benepisyaro kung kini kwalipikado.
Ang BPPO, awardee sa Community Service-Oriented Policing System (CSOPS) ug First Placer niining gipasiugdahan sa Police Commission Region VII Oktubre 4 ning maong tuig, isip pag-ila sa dakong tabang sa kapulisan sa Bohol sa mga Bol-anon pagbaton og hapsay nga kinabuhi gawas sa tahas niini pagmintinar sa kalinaw sa komunidad
Ang Balay sa Paglaum nga adbokasiya sa magtiayong Aumentado paghatag og ayudang pinansyal gikan sa ilang personal nga kinitaan. Kapartner nila ang BPPO sulod na sa duha ka tuig kapin sa maong programa, ug nakapanghatag na sa 97 ka balay sa tulo ka distrito sa Bohol.
Kauban sa maong kalihukan si Sagbayan Mayor Asuncion Ybañez, mga opisyales sa nahisgutang tulo ka barangay, ug PNP Life Coach Maribie Buslon. (RTB)
