NAANGOL ang usa ka lalaki human aksidenteng nakurenteham dayon nahagbong didto sa lungsod sa Loon niadtong milabay nga adlaw.
Ang biktima giila nga si John Michael Luna, 23 anyos, taga Purok-3, Barangay Manga, siyudad sa Tagbilaran.
Sigun sa taho nasuta nga samtang ang biktima didto sa ibabaw nga bahin sa gitrabaho nga balay kay nag-atop. Apan giingong wa kini nakabantay sa iyang gigamit nga barena nga may guna. Dihang nabasa sa ulan ang wire sa barena, aksidente kining nakorentihan ug nahagbong sa ubos.
Daling gihatud ang biktima didto sa Gov. Celestino Gallares Memorial Medical Center sa siyudad sa Tagbilaran. Ug gikatahong nahiagom og samad sa likod nga bahin sa iyang ulo, angol ug bun-og sa kalawasan ug mga paso agi sa kurente.
Samtang naangol ang usa ka lalaki human gidunggab sa iyang katagay kay napikal sa kasabaan niini didto sa Barangay Canlambong, Dimiao, Bohol, pasado alas 7 sa gabii niadtong Martes, Nobiyembre 18.
Ang biktima giila nga si Pablo Paluga y Montemor Jr, 35 anyos ulitawo, may live-in partner, lumolupyo sa maong dapit.
Ang suspetsado nailhan nga si Alberto Dumapias y Fornes, 56, ulitawo, mag-uuma, nagpuyo sa sa samang lugar.
Sa inisyal nga imbestigasyon sa Dimiao Municipal Police Station nagbutyag nga samtang ang suspek ug ang biktima nagtagay og bino uban sa kapuyo ni Paluga nga si Milagros Simbajon sa usa ka videokehan duol sa tindahan sa maong dapit. Ug samtang sila nagkukabildo, nakamatikod ang maong biktima sa usa ka sundang nga gibitay sa usa ka haligi duol sa maong lugar ug nisulti kini,” kinsa maning sundang nga gisab-it aning haligi, aku ning e-uli sa tag-iya”, ug iya kining gitunol ngadto ni Irene Cagatcagat, pagkahuman niini, kalit lamang gidunggab sa maong suspek ang maong biktima.
Bisan og nasamdan na, nakapangutana pa ang maong biktima kang Dumapias og, “ngano imu manku gidunggab Dong” apan gitubag kini, “ngano magpausab ka” dayong sibat sa maong dapit.
Gisikop ang maong suspek sa nirespondeng kapolisan. Samtang ang biktima gibalhin sa Gov Celestino Gallares Memorial Medical Center sa dakbayan sa Tagbilaran.
Nabawian ang maong suspek og usa ka gunting nga may siyam ka pulgada ang gitas- on ug gipunting nga motibo sa maong krimen nagbutyag nga napikal ang maong suspek kay banhaan ang maong biktima. (RTB)
