NAILHAN na sa kapulisan sa Tagbilaran City ang duha ka indibidwal nga giingong responsable sa pagpangawat og kapin ₱800,000 gikan sa Ant Mart sa dihang mihapak ang Bagyong Tino niadtong miaging semana.
Sumala ni Police Lieutenant Colonel Jhon Kareen Escober, hepe sa Tagbilaran City Police Station, ang duha ka suspetsado giingong lumulupyo sa Luzon ug migawas na sa probinsya niadtong Nobyembre 5, 2025.
Bisan pa, nagdumili pa si Col. Escober sa pagbutyag sa ilang mga ngalan tungod kay padayon pa ang imbestigasyon. Ang duha kuno ka suspek ilado na nga mga kawatan sa Baguio ug Cebu ug adunay mga kanhing kaso sa robbery.
Matud pa ni Escober, ang mga suspetsado miyembro sa Aciteline ug Termites Gang — nga giingong naka-evolve na ug kasagarang modus mao ang pag-agi sa likod bahin sa mga establisemento.
Ginasuspetsahan usab nga nakapangbiktima na kini sa Catigbian ug Loay kaniadto. Base sa footage sa CCTV, nakita nga ang mga suspek misakay sa itom-pula nga Toyota Innova, nga giingong giabangan ug gipanag-iya sa taga-Baguio.
Nakuha usab sa kapulisan ang manipesto sa barko nga nakatabang sa pagkilala sa mga suspetsado.
Sa kasamtangan, nagpangunot pa ang kapulisan og dugang testimoniya gikan sa mga saksi ug CCTV footage gikan sa pantalan sa Ubay aron makompleto ang kaso.
Gipasalig ni Col. Escober nga padayon silang maningkamot nga madakpan ang mga suspetsado ug mapugngan ang kalapasan sa dakbayan sa Tagbilaran. (RTB)
