SA PADAYONG kampanya sa Bohol Police Provincial Office (BPPO) batok sa illegal nga droga, usa ka High-Value Individual (HVI) ang nadakpan sa gipahigayon nga buy-bust operation sa kapulisan sa Lila Municipal Police Station (MPS) ubos sa pagpanguna ni PCPT EXELCIS B. BELCIÑA, Chief of Police.
Ang operasyon nahitabo alas 12:01 sa kaadlawon karong Nobyembre 13, 2025, didto sa Purok 4, Barangay Tiguis, Lila, Bohol.
Ang suspetsado giila sa alyas nga “Baray,” 39 anyos, residente sa Barangay Lomanoy, Lila, nadakpan human makumpleto ang transaksiyon sa usa ka police poseur buyer.
Narekober sa operasyon ang 20 gramos nga gituohang shabu nga adunay Standard Drug Price (SDP) nga ₱136,000.00 ug ang marked money nga gigamit sa maong operasyon. Gikarhaan karon ang suspetsado og kaso ubos sa Republic Act 9165 o Comprehensive Dangerous Drugs Act of 2002.
Sa iyang pamahayag, PCOL Patricio C. Degay Jr., Provincial Director, mipasidungog sa Lila MPS ug miingon: “Kini nga kalampusan nagpamatuod sa lig-on nga panindigan sa PNP Bohol batok sa ilegal nga droga! Magtinabangay ta aron makab-ot ang usa ka luwas ug drug-free nga Bohol.” (RTB)
