GIHULAGWAY sa mga magtutudlo ug tinun-an sa Siyudad sa Tagbilaran nga lahi gyud ang face to face classes.
Niadtong Mayo 16, 2022 gisugdan na sa Department of Education Tagbilaran City Division ang pagpahigayon og limited face to face classes diha sa 26 ka tunghaan sa siyudad.
Nagkanayon ang City Deped nga daghan sila og gibuhat nga pagpangandam sa pagpahigayon sa limited face to face classes.
Gisugdan nila sa pagpangutana sa mga ginikanan kon gusto ba nila nga mag-limited face to face classes sa tunghaan ug adunay trainings nga gihimo ug nakig-alayon sila sa barangay nga nisuporta sa pag-abli sa limited face to face classes.
Ang kada tunghaan nga nagpahigayon og limited face to face classes aduna kini isolation room diin adto ibutang ang tinun-an nga taas og body temperature.
Subay niini, gumikan sa kadaghan sa mga mogradwar karong tuiga sa mga pampublikong tunghaan sa Siyudad, gipangitaan una og pamaagi sa Tagbilaran City Division kong mapahigayon ang physical graduation nga dili makalapas sa IATF protocols.
Nagkanayon ang buhatan nga ang mga tunghaan nga ilang gitan-aw adunay sobra sa 400 ka graduates ug lisod kini i-handle kon sundon ang IATF protocols diin ang mahitabo niini ang mga lingkuranan lagyo gyud kay i-obserbar man ang social distancing.
Alang sa City DepEd ang graduation usa ka “happy occasion” nga dili kalikayan nga ang mga estudyante magduol, maghangop, maggakos, magtapok hinungdan nga ilang gitan-aw ang angayang himuon sa public school nga mopahigayon og physical graduation.
Nasayran nga karong June 7, 2022 ang klase sa mga tinun-an ug gitan-aw sa DepEd nga himuon ang graduation rites sa mga estudyante sa Hunyo 13 pataas. (RTB)
