LIMA ka gidudahang tigpamaligya og ginadiling drugas malamposong nadakpan sa Bohol Police Provincial Office (BPPO) sa managlahing operasyon sa lain laing kalungsoran sa probinsiya sa Bohol niadtong nakalabay nga adlaw.
Una niini, ang Duero Municipal Police Station (MPS), ubos sa pagpangulo ni PCPT Justeofino M Hinlayagan, nakasikop sa usa ka 29 anyos nga lalaki, usa ka seaman ug lumolupyo sa Garcia Hernandez, Bohol, mga alas 6:18 sa buntag, didto sa Purok 5, Barangay Alejawan, Duero.
Nakumpiska gikan sa suspek ang 0.80 gramos nga gituohang ilegal nga droga (shabu) nga adunay kantidad nga ₱5,120.00, ug ang pre-marked money nga gigamit atol sa buy-bust operation.
Sunod ang Lila Municipal Police Station (MPS), ubos sa pagpangulo ni PCPT Elexis Belciña, malampusong nakadakop sa usa ka 20 anyos nga lalaki, walay trabaho, lumolupyo sa Barangay Banban, Lila, mga alas 12:56 sa hapon sa Purok 4, Barangay Poblacion, Lila.
Nakumpiska gikan sa suspek ang 0.40 gramos nga gituhuang “shabu” nga nagkantidad ug ₱2,720.00 ug ang buy-bust money nga gigamit sa operasyon.
Ikatulo niini ang Sikatuna Municipal Police Station (MPS), gipangulohan ni PCPT Nelson D Lodripas, nakasikop sa usa ka 30 anyos nga lalaki, laborer, sa Barangay Cambuac Norte, Sikatuna, mga alas 8:32 sa gabii.
Nakumpiska gikan sa iya ang 0.40 gramos nga gituohang “shabu” nga adunay kantidad nga ₱2,729.00 ug ang buy-bust money.
Samtang ang Dimiao Municipal Police Station (MPS), ubos sa pagdumala ni PLT Joel R Ompoc, nakadakop sa usa ka 40 anyos nga lalaki, walay trabaho, lumolupyo sa Barangay Poblacion Ibabao, Loay, Bohol, mga alas 11:15 sa gabii sa Barangay Banban, Dimiao.
Nakumpiska gikan sa suspek ang 6.0 gramos nga gituhuang “shabu” nga adunay kantidad nga ₱40,800.00 ug ang buy-bust money nga gigamit sa operasyon.
Ug sa katapusan, ang Loboc Municipal Police Station (MPS), gipangulohan ni PMAJ Jesus C Daplin, nakasikop ni alias “Olong,” usa ka 34 anyos nga lalaki, trabahante sa konstruksyon, sa Purok 4, Barangay Alegria, Loboc, mga alas 11:23 sa gabii.
Nakumpiska gikan kaniya ang 0.8 gramos nga gituhuang “shabu” nga adunay kantidad nga ₱5,440.00 ug ang pre-marked money nga gigamit sa operasyon.
Giandam nang pasakaan og sumbong paglapas sa Akta Republika 9165 kun Comprehensive Dangerous Drugs Act ang maong mga dinakpan didto sa piskaliya. (RTB)
