GIBUTYAG sa Philippine Health Insurance Corporation-7 nga gilugwayan sa ahensiya ang panahon sa pag-file sa mga claim ug ipatuman ang Zero Balance Billing (ZBB) alang sa mga biktima sa 6.9 magnitude nga linog nga niigo sa Lalawigan sa Sugbo.
Matud ni PhilHealth-7 Vice President Marjorie Cabrieto nga gilugwayan gikan sa 60 ngadto sa 120 ka adlaw ang mga ospital ug uban pang pasilidad sa panglawas sa pagduso sa ilang claims samtang nagpadayon pa ang pagbangon sa probinsiya gikan sa kalamidad.
Gibutyag ni Cabrieto nga gipapas na ang limitasyon nga nagkinahanglan og labing menos 24 oras nga confinement alang sa mga biktima sa linog.
Bisan pa kong ma-discharge ang pasyente nga wala pa mahuman ang 24 ka oras bayaran gihapon sa PhilHealth ang maong pasilidad.
Gipasabot ni Cabrieto nga pinaagi sa Zero Balance Billing policy walay angay ikabalaka ang mga naangol ug ilang pamilya bahin sa bayronon sa ospital.
Ang mga orthopedic implants ug operasyon sa spine, tuhod, ug hawak (hip) apil na sa bayran sa PhilHealth ngadto sa ospital diin gikan sa P100,000 hangtud sa P200,000 ang ilang gigahin depende sa klase sa operasyon.
Lakip sa mga pampubliko ug pribadong ospital nga nagpatuman sa maong polisiya mao ang University of Cebu Medical Center ug Chong Hua Hospital aron masiguro nga ang mga pasyente mogawas nga walay bayronon sa ilang pagpagawas sa ospital.
Ang maong lakang sa PhilHealth-7 kabahin sa ilang disaster response initiatives aron masuportahan ang mga pasilidad sa panlawas ug mga residente nga naapektohan sa linog sa Sugbo.
Gikataho nga niabot ngadto sa dul-an sa 200 ka biktima sa linog sa Northern Cebu ang initial nga naihap sa PhilHealth Central Visayas nga naka-avail sa Zero-Balance Billing o No-Balance Billing.
Gibutyag usab ni Cabrieto nga nakigsabot sila sa Department of Health alang sa pagpatuman sa maong lagda sugod niadtong Oktubre 2, 2025 ilabi na kong adunay mamatay sa mga nadala sa tambalanan nga mga biktima sa linog. Niadtong Oktubre 5, 2025 naaprobahan ang palisiya. (RTB)
