GIPAHIBALO ni Presidente Ferdinand “Bongbong” Marcos Jr. nga makadawat og ₱350 matag bulan ang mga buntis nga sakop sa programa nga “First 1,000 Days” aron masuportahan ang himsog nga nutrisyon ug kahimsog sa mga inahan ug ilang mga anak.
Matod pa ni PBBM, importante nga sugdan na daan ang tabang sa nutrisyon gikan pa sa pagbusong sa inahan hangtod sa unang duha ka tuig sa bata, tungod kay kini maoy pundasyon sa maayong pagtubo ug panglawas sa kabataan.
“Aduna kitay programa nga gitawag og ‘First 1,000 Days.’ Ang pag-ihap niini magsugod sa dihang mabuntis pa lang ang nanay. Busa, apil na dayon sa programa ang buntis ug ang iyang anak nga 0 hangtod 2 anyos nga sakop sa 4Ps, ug makadawat sila og ₱350 kada bulan aron masuportahan ang nutrisyon sa bata,” matod sa Presidente.
Tinguha sa maong programa nga masiguro nga matag bata adunay maayong sinugdanan sa kinabuhi, labi na kadtong mga sakop sa kabus nga pamilya. Ang dugang ayuda dakong tabang aron makapalit og masustansyang pagkaon ug bitamina alang sa mga inahan ug ilang mga anak.
Kini usa ka makabag-ong lakang alang sa mas himsog nga kabataan ug lig-on nga kaugmaon para sa matag pamilyang Pilipino. (RTB)
