NADAKPAN sa kapolisan sa gihimong buybust operation ang usa ka sikat nga vlogger sa Bohol tungod matud pa pagpanghagit niini diha sa social media sa iyang mga bashers nga paadtuon sa ilaha kay iyahang pasuyopon.
Nadakpan siya sa mga operatiba sa Tubigon Municipal Police Station atol sa ilahang buy-bust operation sa Purok 4, Barangay Macaas, lungsod sa Tubigon, probinsiya sa Bohol niadtong Miyerkules sa gabii, Oktubre 15, 2025.
Ang suspetsado mao si Mark Angelo Abucejo o mas naila sa angga niini nga Gegel, 25, nagpuyo sa maong dapit.
Nakuhaan ang suspetsado og 10 gramos sa gituohang shabu nga nagkantidad og P68,000.
Sa impormasyon sa Tubigon Municipal Police Station si Gegel giingong namaligya og illegal nga drugas sa lungsod. Gawas niini, gi-surveillance sab kini subay sa mga report bahin sa iyang illegal drug activity niini nga gipakita pa gyud sa Facebook live.
Ang inahan sa maong vlogger nitug-an nga wala siya magkulang sa pagpahimangno sa iyang anak nga dili moapil sa mga dautan apan dili kini maminaw og mopatoo gani masuko kini kung badlongon.
Ang inahan nibutyag naglibog siya kung unsa iya buhaton ug asa siya padulong ilabi na wala silay igong salapi nga magamit.
Ang inahan nakurat nalang kini sa dihang nadakpan iyang anak sa laing dapit tungod kay nagtuo lang kini nga naa ra sa ilang balay naglibot-libot.
Samtang ang igsuon sa maong vlogger, kinsa sikat usab nibutyag nga wala sila magmakulang sa pagpahimangno sa ilang manghud ug gani kung iyaha kini badlongon o maestoryahan siya kay himoong dautan.
Ang video sa maguwang maoy nakapa trigger sa kapulisan nga kini pangitaon.
Kay matud pa si Gegel nanghagit sa mga bashers nga moadto sa ilaha kay iyaha kining pasuyopon kay anaa siyay daghan nga foil.
Ang maong dinakpan igo nalang sa pagmahay sa nahitabo kaniya ug nitug-an nga igo ra siya mangamitay tungod sa problema sa pamilya.
Samtang usa ka drug personality ubos sa PDEA-PNP regional target list ang nadakpan atol sa buy-bust operation sa PDEA Bohol, Tagbilaran City Police Station ug PNP Bohol Maritime Police sa Purok 7, Barangay Bool, Tagbilaran City, Huwebes, Oktubre 16, 2025.
Si PDEA-7 Regional Director Joel Plaza miila sa suspek nga si alyas Baki, 46, construction painter, nagpuyo sa Barangay Poblacion Ondol, Lungsod sa Loboc, Probinsiya sa Bohol.
Nasakmit atol sa operasyon ang lima ka putos sa gituohang shabu nga nitimbang og 25 gramos nga nibalor og P170,000, buy-bust money, usa ka cellphone ug usa ka motorsiklo.
Usa ka semana gipaubos sa case build up ang suspect ug nasuta nga maka dispose ang suspetsado og 50 gramos nga shabu kada semana.
Nadakpan ang suspetsado niadtong 2015 sa kasong kalambigitan sa illegal nga drugas ug nakagawas pinaagi sa plea-bargaining agreement.
Kasong kalapasan sa Republic Act 9165 ang ipasaka batok sa mga suspetsado. (RTB)
