GIKLARO ni Civil Aviation Authority of the Philippines (CAAP) Airport Manager Angelo Ybañez nga ang ahensiya mismo maoy nagbuot ug nagmugna sa bag-ong terminal fee sa Bohol Panglao International Airport (BPIA), ug dili ang Kagamhanang Probinsyal sa Bohol o ang Aboitiz InfraCapital, nga mao karon ang operator sa terminal.
Kini iyang gipatin-aw atol sa joint committee meeting sa Committee on Peace, Order and Public Safety ug sa Committee on Tourism sa Sangguniang Panlalawigan (SP) sa Bohol gipangulohan sa committee chairman nga sila si Board Member Tomas Abapo Jr. ug Board Member Jiselle Rae Aumentado Villamor, diin gihisgutan ang pagsaka sa terminal fee sa BPIA.
Matod ni Ybañez nga base sa CAAP Memorandum Circular No. 019-2025 nga gilagdaan niadtong Abril 4, 2025, gipatuman ang revised passenger service charge (PSC) ug uban pang bayrunon sa mga airport niadtong Abril 21, 2025.
Ubos sa maong polisiya, ang terminal fee sa international departures misaka gikan sa ₱550 ngadto sa ₱900, samtang ang domestic departures adunay mosunod nga bagong rate ₱350 alang sa international airports, ₱300 sa principal class 1 airports, ₱200 sa principal class 2 airports, ug ₱100 sa community airports. Apil usab sa circular ang bag-ong parking fees ug aeronautical charges nga ipatuman sa tanang CAAP-managed airports sa nasud.
Dugang pa ni Ybañez nga sa wala pa gipatuman ang bag-ong terminal fees, ang CAAP nagpahigayon na og serye sa public hearings niadtong Pebrero 2025 didto sa ilang national office, diin gidapit ang mga airline companies, airport concessionaires, ug uban pang stakeholders.
Tungod niini, giklaro niya nga walay kalambigitan ang Kapitolyo sa Bohol sa pagtaas sa terminal fee, ug ang Aboitiz InfraCapital igo lamang nagpatuman sa direktiba sanglit ilang gitake over ang management sa BPIA niadtong Hunyo 16, 2025.
Ang maong joint committee meeting gitambongan nila kanhi Provincial Administrator Alfonso Damalerio II nga maoy unang mi-isa sa isyu sa pagmahal sa terminal fee ug misulat sa SP aron matuki, representante sa Philippine Airlines (PAL), AirAsia, Cebu Pacific, Aboitiz Infra Capital, Department of Tourism (DOT), Bohol Tourism Office, Provincial Legal Office, ug mga Board Members Benjie Arcamo, Nathaniel Binlod, ug Lucille Lagunay.
Ang klaripikasyon sa CAAP nagtumong sa paghatag ug tin-aw nga pagsabot sa publiko nga ang pagsaka sa terminal fee usa ka nasyonal nga polisiya, ug dili desisyon sa lokal nga pangagamhanan o sa kasamtangang airport operator.
ABOITIZ INFRACAPITAL, MIBISITA
Mibisita sa buhatan ni Gov. Aris Aumentado ang mga opisyal sa Aboitiz InfraCapital uban kang Vincent P. Tan, Vice President, aron ipahibalo ang mga kalamboan sa Bohol–Panglao International Airport.
Lakip sa ilang gipaabot ang umaabot nga pag-operate sa Cebu Pacific A330s (NEO) karong bulana nga makakarga og kapin 459 ka pasahero. Gikinahanglan niini ang dugang nga standby fire trucks ug ambulansya isip preparasyon sa maong operasyon.
Sa laing bahin, gitan-aw usab ni Gov. Aumentado nga ang pagpasulod sa mga pedicab sa sulod sa airport mahimong makahatag og dugang kapilian sa transportasyon alang sa katawhan, apan gikinahanglan nga mosunod ang mga drivers ug operators sa husto nga pletehan.
Kabahin sa dugang bayrunon o airport fees, gipasabut nga dili kini kontrolado sa Aboitiz InfraCapital tungod kay kini gikan sa National Government.
Matod ni Gov. Aumentado nga andam ang Kapitolyo sa pagsuporta sa mga lakang nga makaayo alang sa mga turista ug sa ekonomiya sa Bohol. (RTB)
