NAG-UMOL ang National Bureau of Investigation Central Visayas nag-umol og tulo ka team nga maoy gitahasan sa pagsusi sa mga flood control project sa Rehiyun-7.
Ang tulo ka team nirumbo sa mga dapit sa South, North nga bahin sa probinsya sa sugbo ug usa ka bukiran nga bahin sa Dakbayan sa Sugbo.
Ang girombo sa team sa NBI-7 sa Siyudad sa Sugbo mao ang Barangay Bonbon, usa sa mga bukiran nga bahin sa siyudad diin adunay tulo ka flood control projects nga adunay lain-lain nga contractor.
Unang giadto sa NBI ug mga konsehal sa barangay ang riprap nga gipahimutang sa Sitio Camarin sa maong barangay diin giingong nahuman ang maong proyekto tuig 2021 pa.
Ang Team sa NBI nga nisusi sa istraktura wala na’y nakit-an nga mga karatola kon pilay sukod ug ang budget sa maong proyekto.
Matud sa pipila sa mga residente sa maong dapit nakatabang ang maong proyekto ilabi na sa panahon sa tingbaha.
Gisunod pagsusi sa team ang Sitio Guila ang sumpay sa maong flood control project ug nahinabi usab ang foreman sa maong proyekto kinsa nibutyag nga humana sila sa phase 1 ug anaa na unta sila sa phase 2 apan nahunong human sila makasugat og problema kalabot sa luna nga agian sa maong project.
Gibisita usab sa mga imbestigador ang Sitio Biasong diin adunay mga nakabutang nga project information apil ang revetment structure nga nagkadantidad og dul-an sa P49 milyones.
Ang maong proyekto gisugdan niadtong Marso 19, 2025 ug taposon karong December 23, 2025.
Ang NBI nakabantay nga adunay laing duha ka contractor nga slope protection o riprap nga adunay dul-an sa P97 milyones pesos nga kantidad.
Si Atty. Renan Oliva, NBI-7 director niklaro nga ang gihimo sa team kabahin sa case build-up ug tan-awon pa nila pagmaayo ang flood control project sa mga dapit.
Dugang pa ni Oliva, apil ang Barangay Bonbon sa listahan nga nadawat nila gikan sa DPWH Central Visayas.
Si Oliva nagkanayon nga focus sila karon kong aduna bay ghost project o kadtong mga substandard.
Gipahibalo ni Oliva nga ang makuha nga kasayoran ilahang itugyan ngadto sa task force sa DOJ ug maoy mo forward ngadto sa ICI.
Gipaabot usab unya nga mosusi sa mga dapit nga girombo sa team mao na unya ang technical audit nga gilangkuban sa mga eksperto. (RTB)
