DILI muminus sa P9.8 milyones ang pondo gikan sa Kapitolyo nga gihatod ni Gobernador Erico Aristotle Aumentado ngadto sa kabarangayan sa Sierra Bullones ug sa mga kapunungan nga misalmot sa kalihukan sa lungsod sa Sikatuna dili palang dugay.
Personal nga miabiabi ang gobernador, uban kang Congressman Baba Yap, sa DepEd Undersecretary Trygve Olaivar isip mao ang representante sa pangulo, atol sa selebrasyon sa Sikatuna, pagduyog sa adlaw’ng natawhan ni Pangulong Ferdinand Marcos Jr. diin ang Sikatuna mao ang host municipality sa maong kalihukan.
Apil sa mga aktibidad mao ang seremonya sa pagtunol sa ayudang pinansyal ngadto sa duha ka asosasyon, aron makabaton ang mga membro ning maong kapunungan sa alternatibong panginabuhian.
Mikabat sa P384,481 ang gidawat sa Del Carmen Norte Farmers Association, Balilihan alang sa ilang gikinahanglan nga farm machineries.
Ang Canangcaan Corella Bohol Multi-purpose Cooperative nadawat ang P270,441 alang sa ilang proyekto nga meat processing.
Dakong pasalamat sa mga membro sa kapunungan nga nadawat na nila ang abag nga ilang gihangyo pinaagi sa Provincial Cooperative Development Office (PCDO).
Sa unang termino ni Aumentado, gimugna ang PCDO pagsuporta sa mga asosasyon ug kooperatiba unsaon pagdumala sa pondo nga ilang nadawat gikan sa gobyerno ug sa pagpalambo sa ilang mga proyekto.
Ang mga opisyales sa Calape nga misalmot sa kalihukan sa Sikatuna nidawat usab gikan kang Gobernador Aumentado sa tseke nga nagkantidad og usa ka milyon pesos para sa pagpa-improve sa Calape National High School Covered Court.
Duha ka milyon ka pesos ang nadawat sa Poblacion 1 sa Lungsod sa Sikatuna, pagpa-improve sa ilang farm-to-market road, ug P40,000 ang nadawat sa Cambuac Norte, Sikatuna ayuda para sa ilang gikinahanglan nga laptop sa barangay.
Mapasalamaton si Sikatuna Mayor Justiniana Ellorimo ngadto sa mga ahensya sa Pangagamhanan sa malampuson nga kalihukan ug sa mga benepisyo nga nadawat sa ilang lungsod.
Gipahigayon usab ang seremonya sa pagtunol sa school bags with supplies ngadto sa 261 ka mga kabataan pinaagi sa pondo sa Education Development Center (EDC).
Apil nga nagpadangat sa mga benepisyo ug serbisyo gikan sa Kapitolyo, mao ang Center for Culture and Arts Development (CCAD), BEPO-PESO, Provincial Social Welfare and Development Office (PSWDO), Provincial Health Office ug Medical Outreach Unit (MOU).
Ikaduhang hugna sa kalihukan sa gobernador niadtong adlawa mao ang Duaw ug Kukabildo ngadto sa kabarangayan sa Sierra Bullones.
Sa mensahe ni Aumentado sa facebook page niini, giila sa gobernador nga usa ka panaad kun commitment ang pagduaw ngadto sa mga yanong indibidwal ug sa mga opisyales sa kabarangayan.
Baruganan ni Aumentado nga mahinungdanon ang pakigsandurot ug pagkonsulta ngadto sa katawhan ug pagsubay sa kahimtang niini, alang sa usa ka malampuson nga pagserbisyo sa publiko.
Mikabat tanan sa P6,108,500 ang 13 ka tseke nga gidawat sa LGU Sierra Bullones, Poblacion, San Juan, La Union, Salvador, San Jose, Matin-ao, Danicop, Abachanan ug Barangay Casilay.
Tumong sa maong pondo nga masuportahan ang mga prayoridad nga proyekto sa barangay sama sa pagpasemento sa mga kalsada sa mga mag-uuma, ug pag-suplay sa panginahanglanon sa mga kabatan-onan sa natad sa pagpaugnat sa kusog.
“Kahibaw ko nga ginagmay lang kini nga among gihatag kaninyo pero sigurado mi nga kining among gihatag ninyo sa inyong mga yangongo sa barangay kinasingkasing ug tinud-anay, kay among gibalik nganha kaninyo ang buhis sa katawhan,” matud ni Aumentad
“Mapasalamaton mi ninyo nga inyo ming gihatagan sa oportunidad nga makaserbisyo ug among paningkamutan nga ma-address ang inyong panginahanglanon,” pagdugang ni Aumentado. (RTB)
