SUGDAN na karong Oktubre 4, 2025 ang implementasyon sa Wage Order No. ROVII-26 nga gi-isyu sa Regional Tripartite Wages and Productivity Board – Region VII, nga magpatuman bag-ong minimum wage sa Central Visayas.
Sa Class A o expanded Metro Cebu nga naglakip sa mga syudad sa Carcar, Cebu, Danao, Lapu-Lapu, Mandaue, Naga, Talisay ug mga lungsod sa Compostela, Consolacion, Cordova, Liloan, Minglanilla ug San Fernando, mosaka ang sweldo ngadto sa ₱540/day, dunay usbaw nga ₱39 gikan sa ₱501 karon.
Sa Class B areas sama sa ubang parte sa Cebu province gawas Metro Cebu, syudad sa Bogo ug Toledo, tibuok Bohol, mga syudad sa Bais, Bayawan, Canlaon, Dumaguete, Guihulngan, Tanjay ug ang tibuok Negros Oriental, lakip na ang Siquijor province, ang minimum wage mahimong ₱500/day. Dunay usbaw nga ₱37 hangtod ₱47 kada adlaw gikan sa kasamtangan nga ₱453 ug ₱463.
Gi-usa na usab sa Class B ang kaniadto Class C areas tungod kay ₱10 ra ang ilang kalainan sa sweldo.
Samtang, ang mga kasambahay sa Region VII makadawat na og ₱7,000 matag bulan bisan asa nga dapit sa rehiyon.
Matod sa wage board, apil gihapon ang Negros Oriental ug Siquijor sa Region VII wage coverage tungod kay wala pa mahuman ang porma sa ilang rehiyon. (RTB)
