GIBUTYAG sa Bohol provincial police office (BPPO) nga nakadawat sila og reklamo sa giingong vote buying sa Bohol gikan niadtong Domingo (Mayo 8) sa gabii hangtod sa Lunes (Mayo 9) sa buntag.
Apan ang BPPO miingon nga bisag nagduda pa sila nga posibleng vote-buying apan dili dayon nila makasohan ang mga mihimo niini.
Sumala pa sa Kampo Dagohoy nga bugtong ang paglapas sa Presidential Decree 247 o Prohibiting, and Penalizing Defacement, Mutilation, paggisi, pagsunog o pagguba sa mga banknotes sa Bangko Sentral maoy ilang mapasakang kaso. Kini tungod sa nakitang mga kwarta nga gi-staple sa mga sample ballots.
Subay niini, si Police Brigadier General Roque Eduardo Vega sa PRO-7 miingon nga dili nila kini makonsiderar nga vote buying.
“It’s not necessarily vote-buying, the incident in some areas in Visayas na alleged vote-buying is still under investigation,” matud pa ni Vega.
Samtan miingon usab ang Regional Director sa Commission on Elections (COMELEC) Dennis Ausan, nga nabalaka sila aning mga report apan hangtud nga walay pormal nga moreklamo ug motudlo kun kinsa ang nagbuhat wala silay mapasaka nga kaso.
“Vote-buying is an election offense and criminal case. Hindi verified kung saan yun, paano nangyari yun, so definitely, lahat naman tayo is aware na we cannot pursue a case kung wala tayong ebidensya lalo na kung i-post sa social media,” matud pa ni Ausan. (RTB)
