MIKABAT sa 500 ka mga dairy farmers gikan sa 15 ka mga munisipalidad uban sa mga pribadong sektor, mga empleyado ug opisyales sa gobyerno sa lalawigan ug gikan sa kaulohan ang miduyog sa kasaulogan sa ika-9 nga Bohol Dairy Festival, diin gipahigayon kini sa Kagamhanang Probinsyal pinaagi sa Office of the Provincial Veterinarian didto sa Candijay, Bohol Agosto 13, ubos sa liderato ni Gobernador Aris Aumentado.
Sa mensahe ni Aumentado, gipadayag niini ang panglantaw, nga ang Bohol, paga-ilhon nga usa ka Dairy Capital sa Visayas,” Through this dairy festival, I am hopeful that we are not only showcasing the strength of our dairy industry, but also promoting Bohol as the “Dairy Capital of the Visayas”, a powerhouse in this part of the archipelago, ready to meet the dairy needs of our people.”
Pagdugang sa Gobernador nga mas gipakusgan niini ang mga inisyatibo sa pagpadaghan sa mga breeders nga mamahimong dairy animals kun tinubdan sa gatas aron uban sa mga plano sa National Dairy Authority (NDA) ug Philippine Carabao Center (PCC) para sa Bohol, mas dako ang kahigayonan nga makab-ot ang tinguha sa Bohol isip usa ka Dairy Capital of the Visayas.
Si Undersecretary Jerome Oliveros, sa Department of Agriculture Special Concerns & ODA, Foreign Aids/Grants, Department of Agriculture kinsa mao ang pinasidunggang bisita sa ika-9 nga kasaulogan sa Bohol Dairy Festival, nakadayeg sa Bohol nga sulod sa daghang katuigan, maoy usa sa lima ka nag-unang supplier sa dairy products sa rehiyon7.
Nakadayeg usab kini sa modelo kun pamaagi sa Provincial Local Government Unit, pagpadagan sa Bohol Dairy Industry diin matud pa angayan kini nga kopyahon ug tag-ingun sa ubang LGUs sa nasud ang mga successful best practices sa Bohol Dairy Development Program kun Gatas Bol’ anon Program.
Matud ni Oliveros nga dako ang hagit alang sa dairy sector pagpalapad sa produksyon sa gatas diin 98% sa gigamit sa nasod nga gatas, keso ug uban pang dairy products, giangkat gikan sa gawas sa nasod.
Giawhag ang mga Bol-anon nga mas pakusgan ang produksyon sa gatas ilabina ang mga anaa na sa maong industriya sama sa Candijay, Ubay, Mabini, San Miguel, Alicia, Tubigon, Loon, Catigbian, Inabanga, Carmen, Dagohoy, Trinidad, Talibon, Pres. Carlos P. Garcia ug Batuan.
Matud pa nga kung ang 98% nga dairy products nga gi-import, ang kaugalingong mga dairy industry sa nasod, ilabina ang Bohol mao ang nag-supply niini, dako kaayo kini nga kalamboan alang sa mga dairy farmers.
Si Atty. Marcus Antonius Andaya, NDA National Administrator mipahibalo nga ang Nasudnong Pangagamhanan nagtukod og lima ka dagkong stock farm diin ang matag usa niini kaya mag-alima ug 150 ka dairy cattle nga imported ug makakuha gikan sa maong baka og 20-25 ka litro sa gatas matag adlaw.
Kung ang maong mga imported nga baka maanad na sa klima sa nasod mahimo na kining ibalhin sa multiplier farm diin mahimo na kining dumalahon sa mga farmers o cooperatives.
Pagdugang ni Andaya nga usa sa lima ka maong mga stock farm anaa sa lungsod sa Ubay diin nahimutang kini sa 600 ka ektarya nga farmland.
Ipahimutang didto ang 150 ka dairy cattle ug butangan usab kini og Farmers Information and Technology Services Center (FITS Center), aron matutukan ang paghatag og pagkaon alang sa maong mga baka.
Sa laing bahin gihisgutan usab ni NDA National Administrator ang bahin sa programa uban sa French Government nga usa ka modernong dairy farm nga maga-alima og 300 ka mga baka diin arang maka-proseso og hangtod sa 10 metric tons sa fresh milk matag adlaw.
Ang maong proyekto gipahimutang sa Ubay diin target sa NDA nga pinaagi niini, pauswagon ang produksyon sa gatas ngadto sa 5% sa tuig 2028.
Kauban sa mga mihatag og mensahe sa maong kasaulogan sila si Dr. Benjamin C. Albarece, Assistant Secretary-Dept. of Agriculture, Dr. Ma. Dinah Loculan isip representante ni Dr. Liza Battad, Exec Director Phil. Carabao Center, Senator Francis Pangilinan pinaagi sa video message, DepEd Usec. Trygve Olaivar, Board Member Committee on Agriculture Lucille Lagunay ug Mayor Thamar Olaivar isip mao ang host municipality sa maong kalihukan.
Sa mensahe, giabiabi ni Mayor Olaivar ang tanang mga partisipante, mga dairy farmers ug mga bisita.
Anaa sa okasyon ang presensya nila ni DA7 Regional Director Angel Enriquez, BFAR7 OIC Regional Director Mario Ruinata, Bohol Provincial Administrator Asteria Caberte ug uban pang mga hepe sa mga ahensya sa Kagamhanan.
Human sa kalihukan, gipahigayon nila ni Gobernador Aumentado uban sa NDA, PCC ug uban pang ahensya sa agrikultura ang usa ka close door meeting alang sa paghan-ay sa mga proyekto ug programa nga ipahimutang sa lalawigan.
Mapasalamaton ang OIC-head sa OPV Dr. Meydallyn Paman ug Bohol Dairy Program Coordinator Romulo Garcia sa pagsuporta sa katawhan sa gipahigayon nga Dairy Festival sa Candijay. (RTB)
