GITUTUKAN ni Gobernador Erico Aristotle Aumentado ang pagpalapad sa mga pamaagi nga mapangusgan ang agrikultura ug ang food security sa lalawigan, ning iyang ikaduhang termino.
Subay niini gipatawag sa Gobernador ang Office of the Provincial Agriculturist (OPA) sa iyang opisina sa Kapitolyo, Agosto 7 pagsiguro nga andam ang Kagamhanang Probinsyal pag-implementar sa mga proyekto nga linyada sa direksyon nga Climate-Smart Agriculture and Fisheries isip usa ka Core Domain.
Matud ni Mary Queen Atup, tinugyanan sa OPA-Fisheries, andam na ang project design ug ang pondo nga nagkantidad og Php10,000,000 alang sa pag-establisar og usa ka Mangrove Crab Hatchery with Crab Grow-Out Production kun pagpadaghan sa alimango.
Mipahibalo si Liza Quirog ngadto sa Gobernador nga gikinahanglan ang labing minus tunga sa ektarya nga yuta alang sa maong proyekto.
Si Gobernador Aumentado sa iyang bahin, direktiba niini ngadto kang Quirog nga angay paniguruhon sa OPA nga adto ipahimutang ang proyekto sa mga yuta nga gipanag-iya sa Kagamhanang Probinsyal, pagsiguro nga subay sa nakalatid sa balaod ang mga lakang sa administrasyon.
Dugang pahimangno sa Gobernador nga gikinahanglang masiguro sa OPA nga ang dapit nga nahimutangan sa hatchery haom sa mga alimango pagsiguro nga mabuhi ug musanay gayod kini ug dili mausik ang kwarta sa Gobyerno alang sa maong proyekto.
Sa maong diskusyon ang BISU Candijay maoy unang gitan-aw nga insaktong dapit o bisag asa sa Candijay nga gipanag-iya sa Gobyerno ang yuta, ubos sa pagtugot ni Candijay Mayor Thamar Olaivar.
Dugang niini, plano usab atol sa kukabildo sa Gobernador tali sa OPA ang pagpahigayon karong umaabot nga unang semana sa Septyembre sa Inagurasyon sa Soils and Water Laboratory sa BISU Bilar; ug sa Bangus Holding Area didto sa BISU Clarin.
Kahinumduman nga ang pagpasanay sa Bangus ug Tilapya isip alternatibo nga isda sa kamerkaduhan usa sa mga stratehiya sa kasamtangang administrasyon, pagpakunhod sa presyo sa isda.
Ipahigayon usab ang Groundbreaking Ceremony alang sa Banana and Ubi Tissue Culture Laboratory didto sa BISU Bilar; ang Smart Greenhouses didto sa Macaas, Tubigon ug ang Tropical Fruits Scion Grove nga posibleng adto ipahigayon sa Dimiao.
Panglantaw sa Gobernador uban sa OPA nga pasanayon dinhe sa lalawigan ang maayong klase sa mga high value crops ug mga fruit tree seedlings sa kaugalingong Provincial Nursery.
Kini maghatag og kasayon alang sa mga mag-uuma ug sa mga mahiligon pagpananom nga makakuha og maayong klase sa binhi nga dili na kinahanglanon ang pagpalit gikan sa Mindanao.
“Usa sa atong panglantaw kabahin sa tinguha nga mas mapakusgan ang atong Agrikultura alang sa food security; mao ang pag-establisar og mga pinasahe nga tinubdan sa pagkaon.
Maningkamot kita pinaagi sa OPA nga magmabungahon kining maong mga proyekto isip tubag sa atong tinguha sa food security,” matud ni Aumentado. (RTB)
