GIPANIGURO sa Department of Agriculture-Visayas sa publiko nga nag-implementar sila sa ilang food resiliency programs aron pagsuporta sa komunidad sa tibook Central Visayas.
Kini ang gipasabot sa Bol-anong assistant secretary sa DA-Visayas Atty. Salvador Diputado diin dunay tulo ka mga component ang maong programa: food availability, food accessibility ug food price stability.
Gibutyag ni Diputado nga ang mga mag-uuma ug mananagat ang gihatagan nila sa ‘identification cards’ pagpaniguro nga dili maapektuhan ang ilang inadlaw nga panginabuhian.
Gipasabot niini nga gikonsederar sa departamento ang mga mag-uuma ug mananagat nga mga frontliners tungod kay dako sila og role sa matag adlaw nga food consumptions sa tanan.
Alang sa food accessibility, gipaniguro sa ahensiya nga sa kanunay duna pagkaon available alang sa publiko subay sa KADIWA (Katuwang sa Diwa at Gawa para sa Masaganang Ani at Mataas na Kita), Province on Wheels and mobile stores) program sa DA-Visayas ug uban pang programa nga napahimuslan na sa tanang mag-uuma.
Samtang alang sa food price stability, miingon si Diputado nga ilang gi-mobilize ang mga monitoring team aron sa pagbisita sa mga merkado publiko pagsusi sa suplay sa pagkaon og sa presyo niini.
Nanawagan usab si Diputado sa mga konsumedor sa paghimo sa ilang share pinaagi sa pagtaho sa ilang LGU sa bisan unsang sinyales sa overpricing sa mga palaliton. (RTB)
