DUL-AN sa P800,000 nga kantidad sa ilegal nga drugas ang nasakmit sa Bohol Police Provincial Office (BPPO) sa managlahing anti-illegal drug operation sa lainlaing lungsod sa niadtong Hulyo 28 ug 29, 2025.
Alas 6 sa buntag, Martes, Hulyo 29, 2025, ang Loon Municipal Police Station nilusad og buy-bust sa Purok 5, Barangay Cogon Norte. Ang nadakpan giila nga si Dencio, 45, residente sa maong lugar nga nakuhaan og mga pinakete sa gituohang shabu nga motimbang sa 20 gramos nga mobalor sa P136,000.
Laing drug personality ang nasikop sa Tagbilaran City Police Station sa Purok 1, Elly Hill Road, Barangay Manga alas 8:15 sa gabii, Lunes, Hulyo 28, 2025. Ang nadakpan giila nga si King-King, 31, nga residente sa Purok-4, Barangay Ubujan, Tagbilaran City.
Nakuha sa mga operatiba sa pagpangulo sa hepe nga si Police Lieutenant Colonel John Kareen Escober ang 15 gramos nga gituohang shabu nga dunay standard drug price nga P102,000.
Sa susamang adlaw sa alas 2:50 sa kaadlawon, ang Balilihan Municipal Police Station nakadakop sab og laing drug pusher sa Purok 6, Barangay Boctol sa maong lungsod. Nakuha gikan kaniya ang 10 gramos nga shabu nga mokantidad og P80,000 ug mga drug paraphernalia.
Samtang nadakpan sa Jagna Municipal Police Station ang 19-anyos nga drug personality sa maong lungsod alas 12:58 sa kaadlawon, Lunes, Hulyo 28, 2025. Nakuhaan ang maong suspek og dagkong putos sa gituohang shabu nga motimbang og 70.03 gramos nga dunay standard drug price nga P476,204.
Ang mga nakuhang ebidensya nga ilegal nga drugas ang gipangduso sa PNP Forensic Unit sa BPPO.
Sa susamang kalambuan, kanhi sundalo ug iyang kauban nasakmitan og kapin tunga sa milyon nga shabu sa buy bust operation sa panglao.
Ang gikatahapan nailhan nga usa ka William Guirit, 42 anyos ulitaw ug na dismissed sa serbisyo sa PA ug lumad nga mo lupyo sa Purok 8 sa barangay Poblacion sa Panglao ug ang kauban nga usa ka Oliver Cuaco, 45 anyos ulitawo, Plea Bargainer ug lumad nga molupyo sa barangay Looc sa Panglao.
Nakuha sa posisyun ni Guirit ang usa ka 9mm nga armas de puego ug adunay usa ka buhing bala ug laing onse ka mga putos nga giingong shabu nga gi bana bana mo timbang tanan ngadto sa 80 ka gramo ug anaa sa Standard Drug Price mo kabat tanan ngadto sa 544,000.
Ang mga gikatahapan polos nagtingkagol sa karsel sa kapolisan ug tukmang kaso ang ilang atubangon pinasubay sa balaod. (RTB)
