GI-ORGANISAR ni Bohol governor-elect Erico Aristotle “Aris” C. Aumentado ang usa ka Transition Team nga mutabang kaniya alang sa usa ka hapsay nga pagbalhin sa gahum gikan sa gumagawasay nga panggamhanang probinsiyal.
Gipanguluhan ang mao nga pundok ni Atty. Handel Lagunay, nga kanhing nagsilbi isip Provincial Legal Officer ug Provincial Administrator sa termino ni kanhing Gobernador Erico B. Aumentado.
Kahinumduman nga nagpagawas ang kasamtangang Gobernador Arthur C. Yap ug usa ka executive order niadtong Abril 7, 2022 nga nagmugna sa usa ka provincial government transition team isip pagsunod sa DILG Memorandum Circular No. 2022-029.
Sa usa ka press statement nga gipagawas sa Department of the Interior and Local Government, niingon si DILG Secretary Eduardo M. Año nga ang tanang kabtangan, tala ug dokumentado sa mga local government units kinahanglang itugyan sa usa ka ihag (transparent) ug batid (efficient) nga pamaagi ngadto sa mga bag-ong napili nga mga opisyal “alang sa pagpadayon sa mga nasugdan nang mga programa alang sa katawhan.”
Ang transition team mao usab ang mutigom, museguro ug mag-amping sa tanang mga opisyal nga mga dokumento ug tala sa LGU pinaagi sa naandan na nga pamaagi alang sa bag-ong napili, ug pag-update niini kung ang usa ka opisyal napili pag-usab.
Pila sa mga opisyal nga mga dokumento nga kinahanglang maseguro sa mga LGTTs mao ang mga musunod: 2021 Governance Assessment Report, Contracts and Loans Agreement, Comprehensive Development Plan, 2022 Annual Investment Program, Comprehensive Land Use Plan, Public Service Continuity Plan, LGU’s Citizen Charter, ug pipila ka mga Full Disclosure Policy nga mga dokumento. (PR)
