GIHULAGWAY ni Atty. Eddie Aba, chairman sa provincial board of canvassers nga malampuson ang piniliay sa lalawigan.
Matud ni Aba nga aduna ray gamay nga problema ang nasugatan sama sa depektoso nga vote counting machines apan nailisan ra usab dayon kini.
Niabot ngadto sa 15 ka VCMs ang nakabaton og kakulian diin napadala kini sa Sugbu ug giayo.
Nabantayan sa panahon sa piniliay ang taas nga mga linya sa mga botante paingon sa tagsa-tagsa nila ka clustered precincts.
Nasayran nga aron mamenosan og gamay ang kahuot adunay mga waiting area alang sa mga botante.
Nahimong tulin ang pagbotar sa mga botante gumikan kay kuhaon na nila daan ang ilang sequence number aron dili na malangan inig pangitaay sa ilang mga pangalan.
Subay niini, naproklamar na ni Aba ang mga mananaug sa provincial level sama nila ni Gov. Aris Aumentado ug vice-governor Victor Balite ug mga bokal. (RTB)
