GIMANDO ni Gobernador Aris Aumentado ang Office of the Provincial Veterinarian (OPV) nga hunongon ang pagpatay sa mga baboy nga nataptan sa African Swine Fever (ASF), nga usa ka lakang nga gigamit sa tibuuk nasud sa mga paningkamot nga mapugngan ang pagkaylap sa sakit.
Si Aumentado niingon nga ang pagtugot sa mga baboy nga mamatay tungod sa makatakod nga virus makawagtang sa pagduda sa paglungtad sa ASF o sa positibong resulta sa mga blood test nga gihimo sa mga baboy.
“Ako silang gi ingnan na ‘ayaw na patya,’ patan-awa ng tag-iya sa baboy na mamatay sa ilang atubangan tungod sa sakit aron mo tuo sila na naay ASF, di pa ta kabayad. Di pa maka gasto ang province kay di man sila mo submit, so at least clear ta,” sigon ni Aumentado.
Gikasubo sa gobernador nga pipila ka mga tag-iya sa baboy ang nagkuwestiyon sa gihimo sa gobyerno nga “depopulasyon,” nga mao ang pag-culling o pagpatay sa mga baboy nga nataptan sa virus aron malikayan ang pagkaylap.
“Ang akong advice nila, ipahunong nanang [depopulation], kanang patyon ng baboy kung mag positive kay mao nay usa sa mga nakahatag og hugaw sa mga huna-huna na gituyo og patay bisag naay resulta na positive,” he added.
Matud ni Aumentado nga ang mga panimalay o umahan nga adunay positibong kaso sa ASF ang pagabantayan ug markahan.
Ang mga tag-iya sa baboy gikan niining mga dapita pugngan sa paglihok o pagdala sa ilang mga baboy aron mapugngan ang pagkaylap sa virus.
“Kanang areas na naay positive mao nay e-cordon—dili nila ihawon ang baboy, dili nila dalhon gawas kay ibaligya nila so naa ra sa sulod then mag kawot na, kay in kaso na mamatay, ilubog dayon,” dugang pagpasabot ni Gov. Aumentado. (RTB)
