ADUNAY dakong pagkunhod sa mga kaso sa dengue sa Bohol sa unang lima ka bulan ning tuiga, nga mikunhod og 52.5% kon itandi sa samang panahon sa 2024.
Kini base sa datos nga gipagawas sa Provincial Epidemiology and Surveillance Unit (PESU) sa Provincial Health Office (PHO).
Gikan sa Enero 1 hangtod Mayo 31, 2025, mikabat lang sa 1,205 ka kaso sa dengue ang natala sa probinsya. Kini layo ra kaayo kon itandi sa 2,539 ka kaso nga narekord sa parehong yugto niadtong 2024.
Bisan pa sa makapadasig nga pagkunhod, duha ka kinabuhi ang nakalas tungod sa dengue karong tuiga. Usa ka pasyente ang namatay gikan sa Tagbilaran City, ug ang usa gikan sa Calape.
Ang lungsod sa Talibon ang nagpabiling adunay kinatas-ang gidaghanon sa kaso, nga mikabat sa 164. Gisundan kini sa Tagbilaran City nga adunay 101 ka kaso, Ubay nga dunay 82, Inabanga ug Valencia nga pulos adunay 44 ka kaso, Tubigon nga dunay 41, Bien Unido nga dunay 38, Trinidad nga dunay 37, ug ang Buenavista ug Loon nga pulos dunay 36 ka kaso.
Gipahimangnoan sa PHO ang publiko nga bisan pa sa pagkunhod sa mga kaso, kinahanglan gihapon ang padayon nga kooperasyon sa mga komunidad. Giduso sa PHO ang pagpadayon sa pag-obserbar sa “4S Strategy” sa Department of Health (DOH), aron hingpit nga mapugngan ang pagdaghan sa lamok ug pagkaylap sa sakit.
Ang 4S nagpasabot sa 1.Search and destroy sa mga lugar nga mahimong kapuy-an sa lamok, 2.Secure self-protection batok sa kagat sa lamok (e.g., paggamit og mosquito repellent, pagsul-ob og tag-as nga sinina). 3.Seek early consultation kon adunay hilanat o bisan unsang sintomas sa dengue. 4.Support fogging o spraying sa mga lugar nga giila nga hotspot sa dengue.
Giawhag usab sa PHO ang tanang lokal nga kagamhanan, gikan sa lungsod hangtod sa barangay, nga ipadayon ang ilang mga information, education, and communication campaigns bahin sa dengue. Girekomenda usab ang pag-reactivate sa mga anti-dengue task force hangtod sa lebel sa purok aron mas molig-on ang pagpugong sa sakit sa matag komunidad. (RTB)
