MIKABAT sa Php4,332,000 ang pondo nga gipagawas gikan sa panudlanan sa Kagamhanang Probinsyal, alang sa Indemnification Program sa Office of the Provincial Veterinarian (OPV); diin gipanguluhan ni Gobernador Aris Aumentado ang pag-distribute sa cash assistance entitlement, ngadto sa 357 ka mga apektadong hog raisers, Hunyo 9, didto sa Panda Tea Garden Suites, Dakbayan sa Tagbilaran.
Giabagan ni OPV Officer-in-Charge, Dr. Meydallen Paman ang Gobernador sa maong seremonya, uban ni Romulo Garcia, OPV Supervising Agriculturist, Nunila Pinat Executive Assistant ug Pilar Mayor Wilson Pajo.
Ang maong mga benepisyaryo sa Indemnification Program sa Kapitolyo, nagagikan sa Pob. Sur ug Norte Batuan; La Suerte, Pilar; Bulilis, San Francisco ug Los Angeles, Ubay; Buenos Aires, ug Nueva Vida, Carmen; M. Roxas, Trinidad ug Bayongan, San Miguel.
Dakong pasalamat sa mga benepisyaryo, nga aduna sila’y nadawat nga ayuda gikan sa Kagamhanang Probinsyal, kay magamit nila kini nga puhunan pagtukod og laing panginabuhi.
Sa maong kalihukan, gidayeg sa Gobernador ang tanang nahimong kabahin sa pagpugong nga dili mukuyanap ang maong sakit sa baboy ngadto sa ubang kalungsuran.
“Ang atong gustong mahitabo nga dili matakbuyan ang tibuok Bohol sa maong ASF, kay ang ASF is a very serious issue.
And I am very proud nga ang atong probinsya bisag nasudlan ta sa ASF but because sa atong determinado ug kugihan nga mga taga OPV uban sa mga taga LGU nga misuporta paglaban ani, na-kontrolado nato, dili kaayo dako (ASF),”matud ni Gobernador Aumentado.
Gihangyo sa Gobernador ang publiko, sa pagsabot sa mga lakang nga gipatuman kontra ASF. Gipaniguro niini nga ang pagpanalipod sa panginabuhi sa mga magbabababoy mao ang una niyang gilantaw, nga mapanalipdan kini taliwala sa hulga sa ASF.
“I hope nga ma-feel ninyo ang among seriousness pagpakigbatok ining ASF. Ampo lang ta nga mugawas na ang vaccine nga atong gipaabot. I hope you will understand nga ang among gihimo; ang katuyuan niana para sa safety, sa tanan nga hograiser communities dinhe sa lalawigan,” pagdugang ni Aumentado.
Sa 48 ka mga Local Government Units sa lalawigan, 15 ka munisipalidad lamang ang nasudlan og aktibong kaso sa ASF hangtod ning maong petsa; sumala sa taho sa OPV.
Sa 1,109 ka barangay niini, 41ka barangay lamang ang adunay aktibo nga kaso o 3.69 ka porsyento sa kinatibuk-ang ihap sa kabarangayan. Ang 119 ka barangay nga giobserbahan, walay natala nga bag-ong kaso sa ASF sulod sa kapin usa na ka bulan.
Matud ni Dr. Paman, ang maong taho usa ka indikasyon nga adunay progresibo nga resulta sa mga pamaagi nga gipatuman, pagsumpo sa ASF.
Padayon ang pag-awhag sa Kagamhanang Probinsyal nga sundon ang mga gipatuman nga pamaagi, paglikay nga dili na mutakod ngadto sa ubang baboy ang ASF. (RTB)
