TAGBILARAN CITY, Bohol (PIA) — Giduso sa mga tinugyanan sa Office of the Provincial Veterinarian (OPV) ang pagpadaghan sa mga azolla aron ikadugang sa kan-on sa mga binuhi , alang sa mas himsug ug mas lami-an nga mga karne.
Sa nagkamahal nga mga lawog sa baboy, manok ug mga binuhi, adunay kampanya ang OPV sa feeds component: ang paghatag og azolla aron padaghanon, saysay ni Agricultural Center Chief Aida Sumampong, kinsa maoy division head sa livestock sa nahsigutang buhatan.
“Ang azolla, kasagaran ato rang makita sa mga basakan, ato ra nga labaylabayan, apan taas kayo ni og protein content, sobra sa 20 porsyento, ug kini maayo nga isahug sa lawog sa mga manok ug baboy,” matud pa ni Sumampong.
Ang Azolla dasli ra nga padaghanon ug halos wala nay itugbang nga puhunan kay basta adunay napundo nga tubig sama sa canal, danawan, sapa, suba ug mga aghuban, kining naglutaw nga matang sa paku, kon anaa sa maayong pagkabutang, magkatulo ka pilo ang kadaghanon sa tulo ka adlaw, ug kini kinaham sa mga manok.
Ang azolla, pwede nga isahog dayon sa tahop, mais, kinagod nga lubi, tinadtad nga tangkong ug ipakaon sa mga baboy ug manok, ug kay puno na kini sa protina, mas maayo ang timbang u gang kalidad sa karne sa giihaw, kon itanmdi sa gipakaon sa commercial nga mga lawog.
Alang sa mg buot magpaliwat sa Azolla, adunay mga libre nga ipanghatag sa OPV didto sa ilang farm sa Bilar, sulti ni Sumampong.
Naghatag pod ta og mga trapal nga kapundohan sa tubig aron buhi-an sa azolla, taga tuhod lang nga tubig, dayon mahimo pa usab nga sa ilawom niini, buhi-an og tilapia para dili masayang ang kahigayunan nga makapanud-an usab, matud niya.
Dugang ni Sumampong nga ang usa sa ilang mga gitarget sa azolla ang mga dairy farmers sa Ubay ug mga lungsod nga may nagpasugod na og gatas sa mga kabaw ug baka.
Gawas nga ang Azolla mahimong ipuli sa giburo nga mga sagbot aron ikapakaon sa mga mananap nga gigatasan, ang azolla pwede nga maharvest gihapon sa panahon nga tinghuwaw.
Ang tumong gyud nga may maayong tinubdan sa protina alang sa mga hayopan sa tibuok tuig, aron makadaginot usab sa gasto sa pagpalit og lawog, matud sa OPV. (RAHC/PIA Bohol)
