ANG mga sakop sa Provincial Intelligence Unit sa Bohol Police Provincial Office misikop usab sa usa ka high value target atol sa buy bust operation sa Purok 6, Barangay Poblacion lungsod sa Maribojoc.
Ang suspetsado giila nga si Alberto Beimen Jr, alyas Junjun, 41-anyos, usa ka maintenance worker sa usa ka kompanya nga nagpuyo sa Purok 1, Barangay Guiwanon lungsod sa Maribojoc.
Nakuha gikan kaniya ang binulto sa ilegal nga drugas nga mokantidad sa ₱442,000.00 lakip na ang usa ka kalibre .45 nga pistola.
Matud ni Police Lieutenant Colonel Jomar Pomarejos ang hepe sa PIU sa Bohol PPO nga base sa ilang nakuha nga kasayuran ang amo sa maong suspetsado gialegar nga anaa sa sulod sa usa ka jail facility nga maoy mo-facilitate sa supply sa ilegal drugs.
Giingong makabaligya kini og 30 ngadto sa 50 gramos nga ilegal nga drugas matag semana diin ang iyang area sa distribution mao ang silingang mga lungsod sa Maribojoc ug dakbayan sa Tagbilaran.
Kalapasan sa Section 5 ug 11, Republic Act 9165 ug Comelec Gun Ban ang atubangon nga kaso ni Beimen.
Ang mga nakuhang ebidensya giduso na sa kapulisan sa PNP Forensic Unit sa Kampo Dagohoy alang sa himuon nga chemical analysis.
Subay niini, gidayeg ni Bohol Governor Erico Aris Aumentado ang kapolisan sa ilang sub-sub nga kampaniya batok sa ilegal nga drugas diin pipila ka drug personalities sa duha ka lungsod nga sakop sa maong probinsiya ang nasikop.
Ang kapolisan unang nipahigayon og buy-bust operation sa lungsod sa Buenavista diin nasikop nila ang usa ka 33-anyos nga suspetsadong high value individual niadtong Mayo 27, 2025 sa gabii sa Purok 7, Barangay Poblacion.
Nasakmit sa mga polis gikan sa suspetsado ang 55 gramo nga shabu nga nikantidad ngadto sa P 374,000. ug buy-bust money.
Ang mga suspetsado mag-atubang og kasong kalapasan sa Akta Republika 9165 kun “Comprehensive Dangerous Drugs Act of 2002” ug Akta Republika 10591 kun “Comprehensive Firearms and Ammunition Regulation Act”.
Si Aumentado nipadayag kini sa iyang paghangop sa maong kalamposan sa kapolisan ug nipasalig kini sa iyang hugot nga susporta ngadto sa kapolisan. (RTB)
