TARGET sa Department of Agriculture kun DA nga makunhoran ang presyo sa karneng baboy og bali’g 60 ngadto sa 120 pesos kada kilo sa Hulyo o buwan sa Agosto.
Sigun sa DA, mihimo sila og revised plan aron mapalit ang karneng baboy sa mas barato nga presyo human gibakwi sa ahensya ang gipatuman nga maximum suggested retail price sa maong produkto.
Nagkanayon si DA Secretary Francisco Tiu Laurel Jr. nga posibleng mamahimong 340 ngadto sa 380 pesos ang mamahimong presyo sa karne itandi sa kasamtangang 450 pesos kada kilo nga presyo.
Tinguha usab sa ahensya ang pagmenos sa gitawag nga mga ‘middleman’ subay sa direktiba ni Presidente Bongbong Marcos Jr. Hinungdan nga nakig-alayon kini sa Food Terminal Inc. o FTI aron direktang makapalit, maka-ihaw, ug makahatod sa mga retailer ang mas barato nga baboy. (RTB)
