MALAMPUSON nga naluwas ang upat ka mga mananagat human malunod ang ilang gisakyan nga motorbanca sa kadagatan sa Lungsod sa Dauis, gabii sa Mayo 18, 2025.
Tungod sa kakusog sa bawod nabuslot ang ilang motorbanca ug nasudlan og tubig.
Maayo na lang kay dunay laing fishing vessel nga niagi nga maoy ni-rescue sa upat ka mga mananagat ug gidala sa baybayon nga anaa na sa luwas nga kahimtang.
Matod ni Lieutenant Junior Grade Romulo Balonga Jr., ang pangulo sa Philippine Coast Guard Western Bohol nga gikan sa Lungsod sa Inabanga ang maong mga mananagat ug mopaingon sa Panglao aron managat.
Wala pa gani sila makaabot sa ilang destinasyon, nabuslot na ang ilang pumpboat nga niresulta sa pagkalunod niini.
“Gi-rescue sila unya gibalhin pud sila sa among vessel. Luwas ra man nuon silang tanan,” matod ni Balonga.
Gibutyag sa maong mga mananagat nga duna nay daan nga buslot ang kasko sa bangka apan ila lang kini nga gitapakan aron magamit pa sa ilang pagpanagat.
Nagtuo sila nga ang kadtong tinapakan nga buslot ang nibuka ug didto nisulod ang tubig dagat. (RTB)
