KAPIN sa 30,000 ang nisalmot sa Sara All-Uniteam Grand Supporters Rally nga gipahigayon niadtong Mayo 3, 2022 sa Ubay Sports Complex, Ubay, Bohol.
Kini nga aktibidad gi-organisa sa pundok nga ABante Bohol nga gipanguluhan ni Kongresista Erico Aristotle “Aris” C. Aumentado sa Segundo Distrito, kauban sa Abante Ubay nga gipanguluhan ni Mayor Constantino Reyes. Ang mao nga rally nagtumong nga pakusgan pa ang suporta ngadto sa mga kandidatura nila kanhing Senador Ferdinand “Bongbong” Marcos Jr. ug Davao City Mayor Sara Duterte-Carpio isip presidente ug bise-presidente, ug sa tibuok Uniteam.
Nagsugod kini sa usa ka caravan sa alas-tres sa hapon ug kini naggikan sa Mariveles, Dauis ug nitabok sa kasadpang dapit sa Bohol Circumferential Road nga kung aha maagian ang Siyudad sa Tagbilaran ug mga lungsod sa Cortes, Maribojoc, Loon, Calape, Tubigon, Clarin, Inabanga, Buenavista, Getafe, Talibon, Trinidad, ug Ubay.
Human niabot ang caravan sa Ubay, gisugdan dayon ang rally lapas alas-sais sa gabii pinaagi sa mga pasundayag sa mga lokal nga mga dance groups. Sa mao nga programa, gipa-ila-ila ang mga kandidato nga ubos sa Abante Ubay ug mga probinsyal nga mga kandidato sa ABante Bohol alang sa Segundo Distrito.
Gipasiugda ni Mayor Reyes, nga magpapili pag-usab, ang mga nagkadaiyang proyekto ubos sa iyang administrasyon ug nipahayag usab siya ug pagsuporta sa kandidatura sa tibuok ABante Bohol.
Samtang si Aumentado nisulti sa iyang padalamat ngadto sa katawhan sa Ubay sa ilang walay puas nga suporta ngadto kaniya ug nisaad nga ang ilang krusada nga “Limpyo nga pang gobyerno” ug “Unahon ang Bol-anon” maoy mag-una sa ilang lihok kung sila makadaog.
“Naa ko sa inyong atubangan isip musakripisyo sa mga Bol-anon aron naay alternatibo nga kamo kapilian na mahimong gobernador sa atong lalawigan sa Bohol,” matod pa sa mambabalaod.
Pagkahuman sa ilang proklamasyon isip mga kandidato alang sa duha ka mga pundok, gilingaw nila Jopay and Josh, mga representante ni Duerte-Carpio sa mao nga programa, ang mga tumatan-aw sa mao nga higayuna.
Usa ka pre-recorded nga video message gikan kang Inday Sara ang gipakita sa LED screen, ug sa mao nga mensahe, nagpasalamat ang mayor sa mga Bol-anon nga nipakita og pagsuporta sa iyang kandidatura ug nipahinumdom nga kanunayng higugmaon ang atong nasud.
“Ikinakampanya ko po ang dalawang mensahe na importante para sa malakas na bayan: pagkakaisa at kapayapaan (Akong gikampanya ang duha ka mensahe nga importante alang sa usa ka kusog nga nasud: panaghiusa ug kalinaw),” sulti ni Duterte-Carpio.
Nipasundayag sad ang mga lokal nga mga banda ug grupo sama nila Joseph Gara, Xanu Boys, Xanu Angels ug Izlaraga. (PR/jja)
