GIPAHINUMDOMAN sa Commission on Elections (Comelec) 7 ang tanang mga kandidato nga nidaug ug napilde sa pagsumiter sa ilang Statement of Contributions and Expenditures (Soce) sa dili pa ang deadline.
Si Atty. Francisco Pobe, Comelec 7 director nagkanayon nga ang tanang kandidato dunay hangtod sa Hunyo 11, 2025, sa pag-file sa ilang Soce human sa 2025 National and Local Elections niadtong Lunes, Mayo 12.
Ang mapakyas sa pagtuman sa deadline dunay silot nga maglakip sa posibleng disqualification sa paghupot og katungdanan sa gobiyerno. Ang Soce mao ang pagbutyag sa nagasto sa mga kandidato sa ilang kampanya.
Ang pagsumiter og Soce gimando ubos sa Philippine election law. “In one month, they must submit,” matod ni Pobe.
Ang Soce gikinahanglan sa matag nidaug nga kandidato sa ilang pag-asumir sa katungdanan human sa eleksyon uban sa ilang pagpanumpa ug pagdawat sa certificate of proclamation.
Bisan kadtong ni-withdraw sa eleksyon, kinahanglan nga moduso og Soce.
Ang Section 14 sa Republic Act (RA) 7166, the Synchronized National and Local Elections and Electoral Reforms Act, nagmando nga ang kandidato ug ang political party treasurers mosumiter ug comprehensive, accurate, ug detailed report sa tanang campaign contributions ug expenses sulod sa 30 ka adlaw human sa eleksyon.
Ang RA 7166 naglatid nga kadtong mapakyas mag-atubang og administrative offense.
Ang malapason pabayron og multa nga P1,000 ngadto sa P30,000 sa first offense; P2,000 ngadto sa P60,000 sa sunod.
Ang malapason mag-atubang sab og perpetual disqualification sa paghupot og katungdanan sa gobiyerno.
Ang mga kandidato nga manubra sa ilang gasto sa eleksyon mahimong prisuhon og usa ngadto sa unom ka tuig. (RTB)
