SA USA ka emosyonal nga mensahe nga misangyaw sa social media ug political circles, mipadayag si Congw. Tutor sa ikatulong distrito sa iyang lawom nga pasalamat sa mga supporters human sa 2025 National and Local Elections.
Ang mensahe nga gititulohan “Daghang Salamat, Tersero” naglangkob sa pasalamat, pamalandong sa usa ka dekadang serbisyo publiko, ug pagtan-aw sa mga pagsulay nga iyang nasinati isip kongresista.
Gipasabot ni Tutor nga lisod ug puno og pagsulay ang eleksyon karong tuiga—dunay fake news, character assassination, ug mga panlibak. Apan, matud niya, ang tinuoray nga lider nga motabang ug magtinarong, magpabiling pilion sa katawhan.
Gitumbok usab niya ang The Bohol Monitor nga matud niya dugay na nga nagpakaylap og bakak batok kaniya. Misukol siya pinaagi sa mensahe nga mas napalig-on siya sa ilang mga pagpangdaot.
Gibanatan sab niya ang usa ka personalidad sa media nga iyang gihulagway nga puno sa kasina ug kalagot.
Bisan sa kasakit ug kontrobersiya, mapasalamaton si Tutor sa iyang Kumbati Team, sa iyang bana, ug sa suporta sa mga taga-Tersero. Sa kataposang tinguha, iyang gipadayag: “Tersero, you always have my heart.”
Tungod kay hapit na matapos ang iyang kataposang termino, ang mensahe ni Congw. Tutor nagpabilin nga usa ka simbolo sa paningkamot, pasalamat, ug pagpadayon sa tinuod nga serbisyo publiko. (RTB)
