NAG ATUBANG og formal disqualification nga reklamo ngadto sa buhatan sa Commission on Election ang kanhi Mayor sa dakbayan sa Tagbilaran probinsya sa Bohol nga si John Geesnell “Baba” Yap II human makuhaan og video nga misaad nga mohatag siya og kwarta sa botante.
Ang gihimo sa kanhi Mayor gi konsidera nga usa ka vote-buying nga kalapasan sa Omnibus Election Code.
Miduso og joint affidavit ang lima ka mga residente nga rehistradong botante sa Barangay Bil-isan, lungsod sa Panglao lalawigan sa Bohol.
Si Yap mikandidato pagka kongresista sa unang distrito gipasanginlan nga mihaylo og kwarta bugti sa makuha niya nga boto atol sa iyang pagpangampanya diin nakuhaan kini og video.
Ang mga reklamante giila nga silang Alfeo Estologa Usaraga, Albert Guibone Bompat, Renato Aronales Sarahina, Olimpio Bonao Bompat ug Ursula Hormachuelos Bompat nga mipamatuod ug nanumpa nga sila naka kita sa video nga gi post sa facebook page sa “Voice of Boholanon” niadtong Abril 26, 2025 diin sa video si Yap makita nga minutyag.
“Duhang bulan gikan karon, mubalik sa Baba Yap, singko mil (P5,000) ako ihatag pero og senio citizen, baynte mil (P20,000) ako ihatag, naay senior nga ni pakpak sa likod oh!”
Ang mgq reklamante mibutyag nga ang maong pamahayag subay sa pagpangampanya aron empluwensyahan o ba kaha aghaton ang mga botante pag botar kaniya nga kalapasan matod pa sa Section 261 (a) sa Batas Pambansa Blg. 881 kun Omnibus Election Code nga nag dili sa pagpalit og boto.
Ang maong video makita pa gihapon sa facebook page nga maoy gihimong ebedensya sa mga reklamante.
Dugang sa mga reklamante nga ang maong video tinuod, dili hinimohimo ug takdo sa nahitabong pagpangampanya sa Panglao.
Sa pinanumpaang pamahayag sa mga reklamante ilang gipa authenticate ang maong video isip ebedensya pagmatuod sa accuracy niini ug kalambigitan nga maoy gihimong suporta sa ilang petition pag disqualify ni Yap sa iyang pagka didato pagka kongresista.
Ang maong mga dokumento gi pirmahan atubangan sa notary public sa dakbayan sa Tagbilaran.
Kung mamatud-ang sad-an sa kasong pagpalit og boto si Yap mamahimong mag atubang og disqualification ubos sa Section 68 sa Omnibus Election Code. (RTB)
