GIAWHAG ni Cebu Archbishop Jose Palma ang mga katolikong magtotoo nga sama sa pag-ampo alang sa pagpili ug bag-ong Santo Papa, padayon kining mag-ampo alang ni Pope Leo XIV sa pag-atubang ning dakung responsibilidad sa paggiya sa 1.4 ka bilyong mga katoliko sa tibook kalibutan.
Matud ni Palma gikalipay sa tibook Archdiocese sa Sugbo ang pagkapili sa Santo Papa, nga iyang gihulagway nga usa ka dakung gasa sa ispiritu santo.
Sa samang higayon gicongratulate usab niini ang kapariang Agustino tungod kay usa ka Augustinian priest si Pope Leo XIV.
Naglaum usab si Palma nga aduna na unyay kalambuan sa tinguha nga Sugbuswak o ang pagbahin sa tulo ka diocese sa Archdiocese sa Sugbo.
Isip Prefect for the Dicastery of Bishops kaniadto si kanhi Cardinal Prevost mao ang nagtoon sa sugyot kabahin sa Sugbuswak o pagbalhin sa tulo sa Cebu Archdiocese.
CBCP NAGPASALAMAT
Dakong pasalamat ang gipadayag ni Catholic Bishops’ Conference of the Philippines kun CBCP Spokesperson Jerome Secillano nga hingpit nang napili ang bag-ong Santo Papa nga mahimong Vicar of Christ nga mao si Cardinal Robert Francis Prevost o Pope Leo XIV isip bag-ong lider sa Romano Katoliko nga Simbahan.
Nagkanayon usab si Secillano nga magpabilin ang ‘synodality’ o ang konsepto sa ‘Church as the People of God’ ug wa’y mausab tungod kay padayon gihapon ang suporta sa mga katoliko sa Pilipinas alang sa bag-ong Santo Papa.
Samtang, wala pa’y gipagawas nga schedule ang CBCP alang sa himoong Santos nga Misa apan padayon gihapon ang ilang mga pag-ampo alang sa bag-ong Santo Papa.
SANTO PAPA NAKABISITA NA SA PINAS
Bag-ong napili nga Santo Papa, nakaduaw na sa Pilipinas ilabi na dinhi sa Sugbo sa managlahi nga tuig.
Sa sugbo kaduha nibisita si Pope Leo XIV niadtong 2004 isip Prior General sa Order of Saint Augustine.
Niduaw kini sa Sto Nino De Cebu Parish sa Mohon dakbayan sa Talisay, ug sa 2010 sa Basilica Minore Del Sto Nino.
Samtang nakamisa na usab kini sa San Agustin Church sa Intramuros Manila sa samang tuig. (RTB)
